ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանը այսօր ընդունել է Վերակառուցման եւ զարգացման եվրոպական բանկի (EBRD) պատվիրակությանը:
Հանդիպման նպատակը առաջիկա հինգ տարիներին մրցակցային ոլորտի համալիր բարեփոխումների ծրագրի քննարկումն էր: Հանդիպման ընթացքում նախանշվեց ՀՀ մրցակցային մարմնի եւ ՎԶԵԲ-ի համատեղ իրականացվելիք միջոցառումների մեկնարկը եւ ընթացքը, որը միտված է նպաստելու միջազգային լավագույն փորձի վրա հիմնված մրցակցային օրենսդրության փոփոխությունների իրականացմանը ինչպես նաեւ Հանձնաժողովի ինստիտուցիոնալ կարողությունների զարգացմանը:
Միջազգային գործընկերների հետ քննարկվել են նաեւ մեր երկրի մրցակցային իրավիճակին , օրենսդրական կարգավորումներին եւ առաջիկա մարտահրավերներին առնչվող խնդիրներն ու դրանց լուծման մեխանիզմները: Քննարկման առանցքային թեման առնչվել է նաեւ պետական համակարգի տարբեր ոլորտներում առկա այնպիսի խնդիրներին, որոնք անուղղակի կերպով իրենց բացասական ազդեցությունն են ունենում ընդհանուր մրցակցային դաշտի վրա:
ՏՄՊՊՀ նախագահը իր խոսքում ընդգծել է միջազգային կառույցների հետ ակտիվ համագործակցության կարեւորությունը՝ նշելով, որ Հանձնաժողովը մշտապես հետեւողականորեն ակտիվ աշխատանքներ է իրականացնում տնտեսական մրցակցության ոլորտում միջազգային լավագույն փորձի կիրառման, օրենսդրության վերաբերյալ փորձագիտական գնահատականների ինչպես նաեւ մեր երկրում տնտեսական մրցակցության բարելավմանն ուղղված քայլերի քննարկման նպատակով:
ՎԶԵԲ-ի ներկայացուցիչները բարձր են գնահատել Հանձնաժողովի կողմից վերջին տարիներին մրցակցության ոլորտում արձանագրած առաջընթացը, կատարված էական աշխատանքն ու վստահություն հայտնել, որ առաջիկա 5 տարիների համագործակցությունը էլ ավելի կնպաստի բարեփուխումների ընթացքին ու ոլորտի նոր ձեռքբերումներին:
