Եթե ռուսական լրատվամիջոցները, ավելի ճիշտ պետական հեռուստաալիքները, ինչն ավելի վատ է, ռեպորտաժներ են հեռարձակել Հայաստանի տարածքում մայդանի զինյալների պատրաստման մասին նրանց հետագայում Ռուսաստան ուղարկելու նպատակով, ապա դա վկայում է այն մասին, որ մենք լուրջ խնդիրներ ունենք հայ-ռուսական հարաբերություններում:
NEWS.am-ի թղթակցի հետ զրույցում այս մասին ասաց «Լուսավոր Հայաստան» խորհրդարանական խմբակցության քարտուղար Գեւորգ Գորգիսյանը:
Նրա խոսքով, եթե ներկայիս իշխանությունները չեն կարողանում նման հարցերը կարգավորել կառավարությունների կամ հատուկ դիվանագիտական միջոցների մակարդակով եւ այս ամենը հայտնվում է մամուլում, ապա ակնհայտ է դառնում, որ հայ-ռուսական հարաբերությունները լավագույն վիճակում չեն:
«Մեր ղեկավարությունը, ԱԳ նախարարությունը շատ անելիքներ ունեն՝ չնայած այն հայտարություններին, որ մեզ մոտ ամեն ինչ լավ է, գունազարդ եւ ուղղակի հրաշալի: Կա լուրջ բացթողում եւ նրանք պետք է իրենց ուշադրությունը կենտրոնացնեն այդ հարցի վրա, որպեսզի գոնե ինչ-որ պաշտոնական հերքում կամ գոնե մեկնաբանություն տան», - ասաց պատգամավորը:
Ընդ որում Գորիգիսյանը նկատեց, որ հայ-ռուսական հարաբերությունները բխում են ոչ միայն Երեւանի, այլեւ Մոսկվայի շահերից, քանի որ դրանք փոխշահավետ են եւ դա պետք է գիտակցեն նաեւ Կրեմլում:
Ճիշտ է, պատգամավորը նկատեց, որ հայկական կողմն էլ պետք է ջանքեր գործադրի, որպեսզի ռուսական կողմին ցուցադրի իր շահագրգռվածությունը:
Նա նկատեց, որ Հայաստանն այն երկիրն է, որին Մոսկվայում միշտ կարող էին ապավինել, հատկապես, եթե խոսքն իր շահերի պաշտպանության մասին էր միջազգային կառույցների եւ կազմակերպությունների մակարդակով:
«Հայաստանն այն երկիրն է, որտեղ Ռուսաստանն ունի իր ռազմական բազան եւ ընդ որում դրա համար ոչ մի կոպեկ չի վճարում», - ընդգծեց կուսակցության ներկայացուցիչը, որը մշտապես կողմ էր ԵՏՄ-ից հանրապետության դուրս գալուն:
«Լուսավոր Հայաստանից» պատգամավորի կարծիքով՝ հանրապետության ղեկավարությունը՝ որպես ռազմավարական գործընկեր, իրավունք ունի համարժեք վերաբերմունք պահանջել իր հանդեպ:
«Իսկ եթե մենք ՌԴ-ի ռազմավարական գործընկերը չենք, ապա որքան շուտ արձանագրենք այդ փաստը եւ սկսենք դրանից ելնելով գործել, իմ կարծիքով, այնքան լավ: Իսկ եթե մենք, այնուամենայնիվ ռազմավարական գործընկերներ ենք, ապա ես կարծում եմ, որ նման սադրիչ ոճը ոչ ոքին պատիվ չի բերում», -ասաց Գորգիսյանը՝ հայտնի դարձած տեղեկատվությանը Մոսկվայի արձագանքը չափազանց սուր անվանելով:
Հիշեցնենք, որ «Russia Today» պետական միջազգային բազմալեզու հեռուստաալիքը հետաքննություն էր անցկացրել Երեւանում ԱՄՆ Կոնգրեսի միջոցներով կազմակերպված «CampCamp – 2018» սեմինարի մասին:
«Վրեմյա» հաղորդման փետրվարի 12-ի ռեպորտաժում նշվել էր, որ «ամերիկյան փողերով ինչ-որ կազմակերպություն Երեւանում սեմինար է կազմակերպել, որտեղ ռուս երիտասարդությանը սովորեցրել է հեղափոխություն անել, այսինքն զանգվածային անկարգությունների կազմակերպում՝ հանուն ժողովրդավարության իդելաների եւ իշխանության տապալման:
Հաղորդվել էր, որ սեմինարին մասնակցել են Նիկոլ Փաշինյանի հեղափոխության առանցքային դերակատարները: Նման բնույթի նյութեր հեռարձակվել են նաեւ անցյալ շաբաթ «Ռոսիա 1» պետական հեռուստաալիքի եթերում ( «Վեստի վ սուբոտու» եւ «Վեստի նեդելի» հաղորդումների ժամանակ. «Ռոսիա ՌՏՌ» հեռուստաալիքի միջազգային տարբերակը ազգային հաճախականությամբ վերահեռարձակվում է ողջ Հայաստանի տարածքով: Թեման ռուսական կենտրոնական հեռուստաալիքներում քաղաքական թոք շոուներում քննարկման առիթ էր դարձել: