Վերակառուցման եւ զարգացման եվրոպական բանկը կանաչ տնտեսության ստեղծման հարցում կաջակցի Հայաստանի կառավարությանը: ՎԶԵԲ-ի կողմից մի շարք հայկական ընկերությունների եւ բանկերի պարգեւատրման հանդիսավոր արարողությանը լրագրողոների հետ զրույցում այս մասին ասաց ՎԶԵԲ-ի հայկական գրասենյակի ղեկավար Դմիտրի Գվինդաձեն:
Նրա խոսքով՝ Հայաստանում իրենց աշխատանքում առաջնահերթությունը միշտ տրվել է էներգետիկայի ոլորտին:
«Մենք աշխատում ենք բաշխիչ ցանցերի հետ եւ կառավարության հետ համատեղ խթանում ենք վերականգնվող էներգետիկայի ոլորտը: Վերականգնվող էներգետիկան, այսինքն՝ արեւից եւ քամուց ստացվող, ապագայի էներգետիկա ենք համարում: Մաքուր էներգիայի հիմնական աղբյուրները մենք առաջնահերթ ենք համարում, եւ բարեբախտաբար, այդպես է կարծում նաեւ Հայաստանը», - ասաց նա:
ՎԶԵԲ-ի հայկական գրասենյակի ղեկավար Դմիտրի Գվինդաձեն նկատեց, որ այս ոլորտում բանկի գործունեությունը խաչվում է Հայաստանի կառավարության կողմից հաստատված նախագծերի հետ եւ երկրի ռազմավարության մշակման ժամանակ նրանք հաշվի կառնեն այն բոլոր առաջնահերթությունները, որոնք կառավարությունը հաստատել է:
Ընդ որում՝ Գվինդաձեն հայտնեց, որ վերջերս նոր նախաձեռնություն է ծնվել, որը կհանգեցնի կանաչ տնտեսության ստեղծման: «Այս փուլում համագործակցում ենք փոքր եւ միջին ձեռներեցների հետ եւ համոզված ենք, որ կառավարության կողմից փոքր եւ միջին բիզնեսին տրամադրվող օգնության շրջանակում կնպաստենք կանաչ տնտեսության ստեղծմանն ու զարգացմանը»,- պարզաբանեց ՎԶԵԲ ներկայացուցիչը:
Նա նշեց, որ կանաչ տնտեսության ֆինանսավորումը հատկացվել է «Energo credits line» բավական արդյունավետ գաղափարախոսության շրջանակում, որի իրականացումը 7 բանկերի կողմից սկսվել է դեռեւս 2013 թվականին: «Անչափ կարեւոր է նշել, որ այս բոլոր նախաձեռնությունների վերջնական սպառողներն օգտվում են բավականին օգտակար հնարավորություններից: Խոսքն, այդ թվում, նաեւ կանխիկ ֆինանսական ռեսուրսների մասին է»,- ասաց Գվինդաձեն:
Դրանից բացի, նա ընդգծեց, որ այս նախագծերն իրականացվում են տարբեր կառույցների օգնությամբ, մասնավորապես՝ ԵՄ-ի: ՎԶԵԲ հայաստանյան գրասենյակի ղեկավարը նաեւ հայտնեց, որ իրենց բոլոր հնարավորությունները Հայաստանում օգտագործվում են առանձին վարկային գծեր բացելու համար հատկապես էներգաարդյունավետության գծով փոքր եւ միջին բիզնեսին վարկերի տրամադրման խթանման համար: «Իհարկե, կան առանձին խոշոր նախագծեր, որոնցից մեկը «Մասրիկ» հելիոկայանն է, որի հզորությունը մոտավորապես 55 ՄՎտ կկազմի: Հետագայում կֆինանսավորվի նաեւ տվյալ հելիոկայանի ընդլայնումը», - հավելեց նա: