ՀՀ տնտեսական զարգացման եւ ներդրումների նախարար Տիգրան Խաչատրյանը հանդիպել է Համաշխարհային բանկի Զարգացման քաղաքականության գործառնությունների եւ տեխնոլոգիական ներուժի իրացման առաքելության հետ։
Նախարարությունից NEWS.am-ին հայտնում են, որ նախարարը ողջունել է հյուրերին, ներկայացրել Կառավարության ծրագրի տնտեսական գլխի հիմնական առանցքները եւ նշել, որ ծրագրի նպատակներ հանդիսացող արտադրողականության եւ մրցունակության բարձրացումն անհնար է առանց էական ներդրումների, մասնավորապես՝ տեխնիկական եւ տեխնոլոգիական վերազինման նպատակով։
«Կան որոշակի գործիքներ, որոնք եւս մեզ հուշում են, թե ինչ անելիքներ ունենք։ Մասնավորապես՝ Համաշխարհային բանկի կողմից հրապարակվող մի քանի զեկույցներ մեթոդոլագիական լավ ուղեցույցներ են իրականացվող բարեփոխումների մասով՝ ներկայացնելով ոչ թե Կառավարության ինքնագնահատականը, այլ մասնավոր հատվածի կարծիքը իրականացվող բարեփոխումների մասին», - ասել է Տիգրան Խաչատրյանը։
ՀԲ ներկայացուցիչները նշել են, որ Բանկը պատրաստում է վերլուծական աշխատանք տեղեկատվության եւ հաղորդակցման տեխնոլոգիաների ոլորտի վերաբերյալ, ինչը կարող է օգտակար լինել Կառավարության ներկա առաջնահերթությունների հարցում։ Ըստ ՀԲ ներկայացուցչի՝ Զարգացման քաղաքականության գործառնությունները եւս ազդակ են, որ Համաշխարհային բանկը կառավարության կողքին է իր ծրագրի իրականացման գործում։
ՀԲ Մակրոտնտեսագիտության գծով տնօրեն Սանդիփ Մահաջանի գլխավորությամբ ՀԲ խումբը հետաքրքրվել է ներդրումային միջավայրի բարելավման միջոցառումներով, նախարարի հետ քննարկել օրենսդրական նախաձեռնությունները, ինչպես նաեւ գործարար միջավայրի բարեփոխումները։
Քննարկվել են նաեւ փոքր եւ միջին ձեռնարկատիրության զարգացման եւ տնտեսության բազազանեցման հարցերը։