Ընդհանուր առմամբ Մոլդովայում խորհրդարանական ընտրություններն ընթանում են առանց խախտումների, սակայն ԱՊՀ մասնակից պետությունների միջխորհրդարանական վեհաժողովի հայ դիտորդները որոշ թերություններ են արձանագրել ընտրական գործընթացի կազմակերպման մեջ, հաղորդում է ՌԻԱ Նովոստի-ն:
«Հիմնականում մենք խախտումներ չենք նկատել: Որոշ բաներ մեզ տարօրինակ են թվացել: Այսպես, մեր կարծիքով քվեատուփերը դրված են միմյանցից շատ մոտ հեռավորության վրա…Չկան թեքահարթակներ, ինչը խոչընդոտում է հենաշարժողական խնդիրներ ունեցող քաղաքացիների մասնակցությանը»,-լրագրողներին հայտարարել է ԱՊՀ ՄԽՎ-ի միջազգային դիտորդական խմբի անդամ, ՀՀ ԱԺ Հաշվիչ հանձնաժողովի քարտուղար Արփինե Դավոյանը:
Նա նաեւ նշել է, որ ընտրատեղամասերում կան կուսակցությունների եւ միջազգային առաքելության կողմից բազմաթիվ դիտորդներ, ինչը գործընթացը դարձնում է էլ ավելի թափանցիկ:
Դիտորդական առաքելության նրա գործընկերը նշել է, որ Հայաստանում ընտրատեղամասերում տեսախցիկները տեղադրում են այնպես, որ դրանք նկարում են ոչ միայն քվեատուփը, այլ նաեւ ամբողջ տեղամասը ինչ-որ խախտումներ կամ մանիպուլյացիաներ նկատելու համար:
«Մեր ընտրությունների ժամանակ տեսախցիկն այլ կերպով է տեղարվում. այն նկարում է ամբողջ ընտրատեղամասը, մինչդեռ այստեղ՝ միայն քվեատուփը: Մեզ մոտ տարբերվում է ընտրողի գրանցման բուն գործընթացը, որը հիմնված է կենսաչափական տվյալների վրա, ինչը գործընթացը դարձնում է ավելի թափանցիկ. կենսաչափությունը բացառում է կրկնակի քվեարկության հավանականությունը, ինչպես նաեւ նվազագույնի է հասցնում գործընթացքում մանդկային գործոնի միջամտությունը»,-գործակալությունը մեջբերում է ԱՊՀ ՄԽՎ-ի միջազգային դիտորդական խմբի անդամ, ՀՀ ԱԺ Հաշվիչ հանձնաժողովի նախագահ Վահագն Հովակիմյանի խոսքերը:
ԱՊՀ մասնակից պետությունների միջխորհրդարանական վեհաժողովի միջազգային դիտորդական խմբի կազմում ներառված են 35 միջազգային դիտորդներ ԱՊՀ 7 մասնակից պետությունների ՄԽՎ-ից (Հայաստան, Ադրբեջան, Բելառուս, Ղազախստան, Ղրղզստան, ՌԴ եւ Տաջիկստան): Նրանց շարքերում են պատգամավորներ, իշխանության բարձրագույն օրենսդիր մարմինների նախագահներ, ԱՊՀ ՄԽՎ-ի քարտուղարության աշխատակիցներ եւ ԱՊՀ մասնակից երկրների ՄԽՎ-ի՝ Ժողովրդավարության զարգացման, պառլամենտարիզմի եւ քաղաքացիների ընտրական իրավունքների պաշտպանության մոնիտորինգի միջազգային ինստիտուտի փորձագետներ: Խմբի համակարգողն է Ղազախստանի Խորհրդարանի փոխնախագահ Բեքթաս Բեքնազարովը:
Հանրապետությունում խորհրդարանական ընտրություններն անցկացվում են փետրվարի 24-ին: Մոլդովայում խառը ընտրական համակարգով ընտրություններն անցկացվում են առաջին անգամ. 50 պատգամավորները կընտրվեն կուսակցական ցուցակներից, իսկ 51-ը՝ ըստ շրջանների: Կուսակցական ցուցակներով առաջադրվել են 15 կուսակցություններ եւ դաշինքներ: Ըստ ԿԸՀ-ի տվյալների՝ ըստ տարածաշրջանների՝ առաջադրվել են 319 թեկնածուներ: Հետաքրքրական է, որ Մոլդովայում չեղարկել են «լռության օրը», իսկ քարոզարշավը շարունակվել էր ընտրությունների նախօրեին եւ նաեւ ընտրությունների օրը, սակայն այն չպետք է տեղի ունենա անմիջապես ընտրատեղամասերում:
