Ինձ հայտնի է, որ Հայաստանի վարչապետ Նիկոլ Փաշինյանը զբաղվում է ազգային ավիափոխադրող ունենալու հարցով: Մարտի 6-ին լրագրողների հետ հանդիպման ժամանակ այս մասին ասաց ԱԺ Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերով մշտական հանձնաժողովի նախագահ, «Իմ քայլը» իշխող դաշինքի պատգամավոր Վարազդատ Կարապետյանը:
Նա հիշեցրեց, որ այս ոլորտի փորձագետներից կազմված աշխատանքային խումբ է ստեղծվել: «Հիմա նրանք դիտարկում են ինչպես Հայաստանի, այնպես էլ հարեւան երկրների, ԵՏՄ անդամ երկրների օրենսդրությունը, եւ կարծում եմ, որ շուտով այս հարցում տեղաշարժ կունենանք: Վստահ եղեք, կառավարությունն այս հարցով զբաղվում է, եւ մենք բոլորս ցանկանում ենք, որ Հայաստանն իր ազգային ավիափոխադրողն ունենա»,- ասաց պատգամավորը: Կարապետյանը նաեւ նշեց, որ սեփական ավիափոխադրողի առկայությունը ազգային անվտանգության հիմքերից մեկն է: