Ամերիկյան Ֆլորիդա նահանգում զույգի միջեւ ալկոհոլի ազդեցությամբ ծագած վեճի արդյունքում կինը կրակել եւ վիրավորել է զուգընկերոջը՝ հայտնում է Fox News-ը։
Բրեւարդ շրջանի դատարանը հայտնել է, որ 47-ամյա Լորի Մորինին սպանության փորձի մեղադրանք է առաջադրվել։ Իր հերթին Մորինը հայտարարել է, թե կրակոցը պատահաբար է եղել։
Միջադեպից տուժած Բրեթ Էլգուդին մահճակալի կողքին արյան լճի մեջ հայտնաբերել են չորեքշաբթի գիշերը։ Նրան հիվանդանոց են տեղափոխել։
Ինչպես նշվում է պաշտոնական փաստաթղթերում, տղամարդը մի շիշ ռոմով, վարդերով, կոնֆետներով եւ խռմփոցի դեմ կպչուն ժապավենով եկել է իր սիրելիի մոտ։ Նրանք խմել եւ թուղթ են խաղացել։
Վեճը սկսվել է գիշերը, երբ Մորինը հրել է Էլգուդին, քանի որ նա խռմփացրել է քնի մեջ։
Երբ տղամարդը վեր է կացել անկողնուց, բարձր կրակոց է լսել, իսկ այնուհետեւ արթնացել է սեփական արյան լճի մեջ՝ աջ թեւատակի սուր ցավով։
Մորինը կալանավորվել է առանց գրավի իրավունքի՝ հայտնում է Fox 35 Orlando-ն։