Հայաստանի նորընտիր Ազգային ժողովը բարձր է գնահատում փոխշահավետ եւ փոխլրացնող համագործակցությունը, ինչպես նաեւ ՆԱՏՕ-ի եւ մյուս գործընկեր երկրների հետ քաղաքական երկխոսության մակարդակը: Այս մասին մարտի 13-ին Ազգային ժողովում «Հայաստանի Հանրապետության Զինված ուժերի խորհրդարանական հսկողություն» թեմայով սիմինարի ժամանակ ասաց Պաշտպանության եւ անվտանգության հարցերով խորհրդարանական մշտական հանձնաժողովի նախագահ, ՆԱՏՕ-ի Խորհրդարանական վեհաժողովում հայկական պատվիրակության ղեկավար, իշխող «Իմ քայլը» դաշինքից պատգամավոր Անդրանիկ Քոչարյանը՝ հանդես գալով ողջույնի խոսքով:
Ընդ որում՝ նա հույս հայտնեց, որ հանդիպումները հիմնավոր ու արդյունավետ կլինեն: «Հուսով եմ, որ այս հանդիպումները կնպաստեն երկկողմ հարաբերությունների ավելի ընդարձակ եւ բազմակողմանի զարգացմանը: Սա կարող է լինել շատ օգտակար հարթակ համատեղ աշխատանքի եւ ցանկությունների որոշման, որոշ խնդիրների ծրագրման ու իրականացման համար: Ես նաեւ մեծ նշանակություն եմ տալիս այս միջոցառմանը քաղաքացիական հասարակության ակտիվ մասնակցությանը»,- նշեց Քոչարյանը:
Հիշեցնենք, որ Հայաստանում ընթանում է ՆԱՏՕ-ի հերթական շաբաթը: