Ցամաքային կենդանիների 42 տոկոսը, քաղցրահամ ջրերի կենդանիների 34 տոկոսը եւ ծովային անողնաշարավորների 25 տոկոսը ոչնչացման եզրին են։ «Մենք կենդանի բնության ոչնչացման վկաներ ենք հանդիսանում»,- ասվում է Շրջակա միջավայրի հարցերով ՄԱԿ-ի ծրագրի զեկույցում, որի հեղինակները նախազգուշացնում են այդ եւ մոլորակի ավերման այլ աղետալի հետեւաանքների մասին՝ կոչ անելով միջազգային հանրությանը շտապ միջոցներ ձեռնարկել։
Փաստաթղթի հեղինակները ելնում են նրանից, որ ուրբանիզացիայի եւ բնակչության աճի պայմաններում մարդկանց պահանջները բավարարելու համար ավելի ու ավելի շատ ռեսուրսներ են պահանջվում։ 1975-ից ի վեր քաղաքների եւ մերձքաղաքային շրջանների մակերեսը 2,5 անգամ մեծացել է ։
Ընդ որում Երկրի պաշարները նվազում են, իսկ քաղաքների բարեկարգման, ենթակառուցվածքների կառուցման եւ սննդամթերքով բնակչության ապահովման մարդու բուռն գործունեությունը քայքայում է մոլորակը։ Դրա հետեւանքով մեզ սպառնում է կլիմայի փոփոխություն, օդի եւ օվկիանոսների աղտոտվածություն, կենսաբազմազանության կորուստ, հողերի դեգրադացիայի եւ անապատացման ծավալների աճ, անտառների ոչնչացում։ Որպես կանոն, այս դեպքում տառապում են բնակչության ամենաչպաշտպանված շերտերը՝ կանայք, երեխաները, աղքատները եւ այլն։
Զեկույցի հեղինակները վստահ են, որ արտադրության սպառման այժմյան մոդելները կայուն չեն՝ եթե ոչինչ չփոխենք, բնապահպանական ցուցանիշները ավելի կվատանան։ Ավելին, այդ մոդելները երկարաժամկետ հեռանկարում կարող են ավելի թանկանալ, քանի որ հետեւանքները վերացնելը միշտ ավելի թանկ է նստում, քան դրանք կանխելը։
Միջոցները, որոնք ձեռնարկվում են, բավարար չեն, որպեսզի կանգնեցվի ոչնչացման գործընթացը, իսկ բնակչության աճի հետ սննդամթերքի, ջրի եւ էներգակիրների պահանջարկը, ինչը նշանակում է նաեւ պաշարների շահագործումը, միայն կաճեն։
Գիտնականներն առաջարկում են մի շարք կոնկրետ քայլեր, որոնք, նրանց կարծիքով, կարող են կանգնեցնել բացասական միտումները, սակայն նախազգուշացնում են, որ դրանք պետք է շտապ իրականացվեն։