Երեւան-Սեւան ավտոճանապարհի Աճառյան փողոցում մարտի 16-ին մահվան ելքով վրաերթ է տեղի ունեցել։
Shamshyan.com-ի փոխանցմամբ, ժամը 22:00-ի սահմաններում, անհայտ մակնիշի եւ համարանիշի ավտոմեքենայի վարորդը վրաերթի է ենթարկել հետիոտնին, եւ թողնելով անօգնական, դիմել փախուստի: Վրաերթի ենթարկվածը տեղում մահացել է:
Մի քաղաքացի ահազանգել է Երեւանի ՃՈ օպերատիվ կառավարման կենտրոն եւ հայտնել, որ վրաերթն ինքն է կատարել, իր կողմից վարած Nissan մակնիշի ավտոմեքենայով եւ ավտոմեքենան գտնվում է ավտոտնակում:
Աղբյուրը հայտնում է, որ Երեւանի ՃՈ պետի գլխավորությամբ ոստիկանները հայտնաբերեցին նշված ավտոմեքենան, որը Nissan X-Trail մակնիշի 35 СP 115 համարանիշի է, վարորդն էլ եղել է 57-ամյա Ալեքսանդր Ֆ.-ն: Նա տեղում ենթարկվեց սթափության փորձաքննության, պարզվեց, որ նա գտնվում է խմածության ամենաբարձր աստիճանի:
Նա ոստիկաններին հայտնեց, որ ինքը խմել է դեպքից հետո, քանի որ վախեցել է եւ ծանր է տարել տեղի ունեցածը: Աղբյուրի տեղեկություններով, քննիչի որոշմամբ Ալեքսանդր Ֆ.-ն ձերբակալվել է: Ավտոմեքենան քննիչի որոշմամբ տեղափոխվել է Երեւանի ՃՈ պահպանվող հատուկ տարածք:
