Ավստրալացի Բրենթոն Թարանթը, ով մեղադրվում է Նոր Զելանդիայի Քրայսթչերչ քաղաքի մզկիթներում 50 մարդու սպանության համար, հրաժարվել է փաստաբանի ծառայությունից: Այս մասին The New Zealand Herald պարբերականում հայտնել է դատարանի նշանակած Թարանթի փաստաբան Ռիչարդ Պիտերսը: Դատական առաջին նիստում նա էլ հեց հանդես է եկել որպես ավստրալացու պաշտպան:
«Պաշտպանյալը հայտնել է, որ ցանկանում է ապագայում դատավարության ժամանակ իրեն ինքնուրույն ներկայացնել, եւ ինձ չթվաց, թե նա որեւէ հոգեկան կամ հոգեբանական խնդիր ունի՝ բացառությամբ, իհարկե, ծայրահեղ աջ հայացքները, որոնց հետեւում է»,- ասել է փաստաբանը:
Պիտերսը նշել է, որ իրենց շփման ժամանակ Թարանթը տեղի ունեցածի համար զղջում կամ ափսոսանք չի արտահայտել, եւ որ փաստաբանից նրա հրաժարվելը, հավանաբար, թելադրված է դատավարությունը որպես իր հայացքների քարոզչության համար հարթակ օգտագործելու ցանկությամբ:
Գործով հաջորդ լսումները տեղի կունենան ապրիլի 5-ին:
Մարտի 15-ին Նոր Զելանդիայի ոստիկանությունը հաղորդում էր ստացել Քրայսթչերչի երկու մզկիթներում հրաձգության մասին, որոնցում այդ պահին եղել էին հարյուրավոր մարդիկ: Դեպքի վայր ժամանած իրավապահները հարձակումների կազմակերպման կասկածանքով 3 մարդու են ձերբակալել, սակայն հարձակման մեղադրանք է առաջադրվել մեկին՝ Թարանթին: Հարձակման հետեւանքով զոհվել է 50 մարդ, եւս 50-ը մարմնական վնասվածքներ է ստացել:
Հարձակման նախօրեին Թարանթը համացանցում փաստաթուղթ է հրապարակել, որը ահաբեկչության դեմ պայքարի ոլորտի փորձագետները համեմատել են նորվեգացի ազգայնական Անդերս Բրեյվիկի «մանիֆեստի» հետ, ով զանգվածային ահաբեկչություն էր կատարել 2011 թվականի հուլիսին:
