Հինգշաբթի Google ընկերությունը որոնման համակարգի մեկնարկային էջին տեղադրել է ինտերակտիվ դուդլ (լոգոտիպ, որ ոճավորված է որեւէ տոնի կամ իրադարձության պատվին)՝ նվիրված կոմպոզիտոր Յոհան Սեբստյան Բախի ծննդյան տարեդարձին: Սա արհեստական ինտելեկտի հիմքի վրա ստեղծված առաջին դուդլն է, փոխանցում է ՏԱՍՍ-ը:
«Դուդլն օգտատերերին թույլ կտա իրենց կոմպոզիտոր զգալ եւ մեղեդի ստեղծել մեքենայական ուսուցման տեխնոլոգիայի միջոցով: Արհեստական ինտելեկտը մեկ հպումով նոտաների հավաքածուն կվերածի իսկական ստեղծագործության՝ Բախի երաժշտական ոճով»,- նշված է ընկերության հաղորդագրության մեջ:
Մշակողներն օգտագործել են կոմպոզիտորի օրհներգերը՝ բացակայող նոտաներով եւ արհեստական ինտելեկտին խնդրել դրանք վերականգնել:
Նշվում է, որ օգտատերերը կկարողանան երաժշտական ստեղծագործություններ ստեղծել եւ այն համացանցում տարածել երկու օր (մարտի 21-ին եւ 22-ին):