Նյու Դելին ողջունում է Լոնդոնում հնդիկ միլիարդատեր, ոսկերչական ընկերության սեփականատեր Նիրավ Մոդիի ձերբակալումը, որին մեղադրում են խարդախության մեջ։ Ինչպես մամուլին տեղեկացրել է Հնդկաստանի ԱԳՆ ներկայացուցիչ Ռավիշ Կումարը, երկրի իշխանությունները փորձում են հասնել նրա արտահանձնմանը, տեղեկացնում է ՏԱՍՍ-ը։
«Մենք ողջունում ենք Նիրավ Մոդիի ձերբակալումը Միացյալ Թագավորության իշխանությունների կողմից՝ Վեսթմինսթրյան դատարանի տված ձերբակալման օրդերին համապատասխան։ Հնդկաստանի կառավարությունը շարունակում է Մեծ Բրիտանիայի համապատասխան պաշտոնական անձանց հետ քննարկել Նիրավ Մոդիի արտահանձնման հարցը որքան հնարավոր է շուտ»,- Կումարի խոսքերը մեջբերում է NDTV հեռուստաալիքը։
Մոդին կալանվել էր Լոնդոնում, հնդկական իշխանությունների խնդրանքով։ Չորեքշաբթի դատարանը հրաժարվել է նրան գրավի դիմաց ազատ արձակել։ Նիրավ Մոդիին կասկածում են ավելի քան 2 մլրդ դոլար գրպանելու մեջ։ Ինչպես կարծում է Հնդկաստանի Հետաքննությունների կենտրոնական բյուրոն, Մոդին գործարքի մեջ է մտել Փենջաբի ազգային բանկի աշխատակիցների հետ՝ այդ գումարը յուրացնելու նպատակով։
Հնդկաստանի պատմության մեջ այս ամենախոշոր խարդախության մասին հայտնի է դարձել 2017 թվականի վերջին։ 2018-ի հունվարին Մոդին եւ նրա հարազատները փախել են Հնդկաստանից։