2001թ. հոկտեմբերի 1-ին զորամասում սպանված ժամկետային զինծառայող Արայիկ Ավետիսյանի մայրը չի հավատում, որ նոր իշխանությունները շահագրգռված են իր որդու գործը վերաբացելու և իրական մեղավորներին գտնելու հարցում։ Այս մասին այսօր՝ մարտի 21–ին լրագրողների հետ զրույցում ասաց սպանված զինծառայողի մայրը՝ Անահիտ Մկրտչյանը, որը կրկին կառավարության մոտ էր եկել՝ իր բողոքը հայտնելու։
«Թոզ փչոցի է, ուզում են ասել, որ մենք զբաղվում ենք այդ հարցով»,– ասաց տիկին Մկրտչյանը։
Տիկին Մկրտչյանը պատմեց, որ իշխանափոխությունից հետո ինքը դիմել է Նիկոլ Փաշինյանին՝ գործը վերաբացելու խնդրանքով և պահանջել, որ պատասխան տա իրական մարդասպանը։ Վարչապետի հանձնարարությամբ գործը վերաբացվել Է, բայց պարզվել է՝ տարիներ առաջ կատարված հանցագործությունը բացահայտելու համար եղած ապացույցներն ու վկաները հիմա անհետացել են։
«Ինձ գործող քննիչն ասաց, որ բոլոր ապացույցները ոչնչացվել են, վկաները անհետացել են։ Դիմել եմ տղայիս զորամաս, բայց ասում են, որ արխիվները նույնպես ոչնչացրել են »– պատմեց նա։
Սպանվածի մոր կարծիքով՝ տարիներ առաջ որդուն սպանել են գումարի պատճառով։ Հրամանատարն արձակուրդ ուղարկելու համար իր որդուց 100 դոլար գումար է պահանջել, ինչպես ընդունված է իրենց գումարտակում: Արայիկը վճարել է ընդամենը 15 000 դրամը, քանի որ տնեցիների ձեռքին փող չի եղել։ Հրամանատար Մհեր Ստեփանյանն էլ, մոր պնդմամբ, իր աշխատասենյակում ծնկի է իջեցրել ժամկետային զինծառայողին և ատրճանակով կրակել գլխին, սակայն նրա փոխարեն դատապարտվել է ծառայակիցը։
2003թ. դեկտեմբերին Վայոց Ձոր մարզի առաջին ատյանի դատարանի որոշմամբ, Արայիկ Ավետիսյանին անզգուշությամբ սպանելու համար 6 տարվա ազատազրկման է դատապարտվել նույն զորամասի ժամկետային զինծառայող Կարեն Սարգսյանը, իսկ նախաքննության ներկայացրած վարկածում Մհեր Ստեփանյանի մեղավորության վերաբերյալ որևէ խոսք չի եղել: Զոհվածի ծնողների բողոքարկումից հետո դատարանի վճռով նշանակվել է լրացուցիչ քննություն, որն այդպես էլ դատարան չի հասել ու 2009թ. փետրվարի 10–ին քննիչի որոշմամբ քրեական գործի վարույթը կասեցվել է: