Հայաստանում մենաշնորհը պետք է արմատախիլ արվի, եւ այս ուղղությամբ մենք հասել ենք կոնկրետ արդյունքների։ Այս մասին մարտի 27-ին կառավարության 2018 թվականի գործունեության հաշվետվությունն Ազգային ժողովում ներկայացնելիս ասել է Հայաստանի վարչապետ Նիկոլ Փաշինյանը։
Նրա խոսքով՝ շաքարավազ ներմուծող ամենախոշոր ընկերության տեսակարար կշիռը շուկայում կազմել է 78 տոկոս՝ նախկին 95-ի փոխարեն։ «Բանան ներմուծող ընկերության տեսակարար կշիռը կազմել է 30 տոկոս նախկին 57-ի փոխարեն։ Բենզին ներմուծող ամենամեծ ընկերության տեսակարար կշիռը կազմել է 29 տոկոս նախկին 43-ի փոխարեն, իսկ դիզվառելիքի մասով՝ 29 տոկոս նախկին 51-ի փոխարեն»,- ասել է Փաշինյանը։
Նա հավաստիացրել է, որ մրցակցային միջավայրը երկրում բարելավվել է, մյուս ընկերությունների գործունեության դաշտ է բացվել։ Ընդ որում՝ «սեփականության ոչ մի վերաբաշխում տեղի չի ունեցել, եւ այս շրջանում կառավարությունը ոչ մեկից բիզնես չի խլել»։
