ԱՄՆ վարչակազմը եւ Թուրքիան պետք է ԱՄՆ Կոնգրեսին բացատրեն, թե ինչու էր Անկարան ստիպված գնել ռուսական Ս-400 համակարգը: Այս մասին հայտարարել է արտգործնախարար Մեւլութ Չավուշօղլուն, հաղորդում է Reuters-ը:
Նրա խոսքով, Թուրքիան Ս-400 է ձեռք բերել, քանի որ դա անհետաձգելի ահրաժեշտություն էր երկրի համար:
«ՆԱՏՕ-ն ի վիճակի չէ պաշտպանել մեր օդային տարածքը»,- ասել է նա:
Նա նշել է, որ Թուրքիան, համակարգը ձեռք բերելով, չի վանում ՆԱՏՕ-ի իր դաշնակիցներին: «Մենք պետք է միասին աշխատենք Սիրիայի եւ այլ հարցերով»,- ասել է Չավուշօղլուն՝ հավելելով․ «Թուրքիան պաշտպանում է ՆԱՏՕ-ի զսպման եւ երկխոսության երկակի քաղաքականությունը Ռուսաստանի հանդեպ»:
Նա նշել է, որ Թուրքիան ԱՄՆ-ին առաջարկել է ստեղծել տեխնիկական աշխատանքային խումբ, որոշելու համար, որ Ս-400-ը վտանգ չի ներկայացնում ԱՄՆ-ի կամ ՆԱՏՕ-ի ռազմական տեխնիկայի համար:
«Ս-400-ը չի ինտեգրվի ՆԱՏՕ-ի համակարգում, ուստի մենք Միացյալ Նահանգներին առաջարկում ենք տեխնիկական աշխատանքային խումբ ստեղծել՝ համոզվելու համար, որ այս համակարգը սպառնալիք չի ներկայացնելու ո՛չ ԱՄՆ-ի F-35 կործանիչների, ո՛չ ՆԱՏՕ-ի համակարգերի համար», - ասել է նա՝ հավելելով, որ Ս-400-ի գործարքը կայացել է, եւ Անկարան չի հրաժարվի դրանից:
Նրա խոսքերով, Անկարան չպետք է ընտրի Ռուսաստանի եւ այլ երկրների միջեւ։ «Մենք մեր հարաբերությունները Ռուսաստանի հետ չենք դիտարկում որպես այլ երկրների հետ հարաբերությունների այլընտրանք։ Եւ ոչ ոք, ո՛չ Արեւմուտքը, ո՛չ Ռուսաստանը չպետք է եւ չեն կարող խնդրել մեզ ընտրություն կատարել իրենց միջեւ»,- նշել է նա՝ հայտնում է «Անադոլու»-ն։
«Թրամփն ինքը հեռախոսազրույցում խոստովանել էր, որ ԱՄՆ-ը սխալ է թույլ տվել՝ Թուրքիային չվաճառելով ՀՀՊ Patriot-ներ, եւ խոստացել է Էրդողանին հոգալ այդ մասին»,- ասել է Չավուշօղլուն։
ԱՄՆ-ը դադարեցրել էր Թուրքիային F-35-երի համար սարքավորումների մատակարարումը եւ հայտարարել էր բոլոր հետագա մատակարարումները դադարեցնելու մասին։
Վաշինգտոնն այդ քայլին դիմել է Թուրքիայի կողմից ռուսական ՀՕՊ Ս-400 համակարգերի գնման պատճառով։ ԱՄՆ-ը վստահեցնում է, որ ռուսական համակարգը սպառնալիք է ներկայացնում F-35-երի համար, քանի որ կարող է ընկալել դրա խոցելիությունը։
Մարտի 28-ին ԱՄՆ Կոնգրեսը հաստատել է օրենսդրական նախագիծը, որն արգելում է Թուրքիային F-35 կործանիչների մատակարարումը։ Սենատորները առաջարկել են կործանիչներ չտրամադրել Անկարային այնքան ժամանակ, քանի դեռ ամերիկյան կողմը Ս-400-ի արձակումից Թուրքիայի հրաժարվելու երաշխիքներ չի ստացել։
