Թավշյա հեղափոխության ժամանակ Հայաստանը դարձյալ ապացուցեց, որ դեմոկրատական երկիր է։ Այս մասին ապրիլի 11-ին ասել է Հայաստանի վարչապետ Նիկոլ Փաշինյանը Ստրասբուրգում Եվրոպայի խորհդրի գլխավոր քարտուղար Թորբյորն Յագլանդի հետ համատեղ մամուլի ասուլիսում։
«Կարեւոր է այն, որ դեմոկրատական հեղափոխությունը Հայաստանում լիովին ներքաղաքական գործընթաց էր։ Ոչ մի օտարերկրյա ուժ ներգրավված չի եղել այդ գործընթացում, ինչը հերթական անգամ ապացուցում է, որ դեմոկրատիան ձեւավորվել է մեր ժողովրդի մտքերում»,- նշել է Փաշինյանը։
Նրա խոսքով՝ Հայաստանը Եվրոպայի խորհրդի աջակցության կարիքն ունի երկրում արդյունավետ գործող դեմոկրատիայի հաստատման գործում։
«Անհրաժեշտ է նաեւ նշել, որ Եվրոպայի խորհրդի գործունեությունը Հայաստանում նպաստել է երկրում դեմոկրատական փոփոխություններին»,- նշել է վարչապետը՝ հավելելով, որ երկրին անհրաժեշտ է ԵԽ փորձը դեմոկրատիայի հասնելու, դեմոկրատական ինստիտուցիոնալ կառույց, օրենքի գերակայություն եւ խոսքի ազատություն հաստատելու գործում։
Հիշեցնենք, որ Փաշինյանը ապրիլի 11-ին կմասնակցի ԵԽԽՎ գարնանային լիագումար նիստին, որի ընթացքում հանդես կգա ելույթով (Երեւանի ժամանակով ժամը 14.00-ին), ինչպես նաեւ կպատասխանի պատգամավորների հարցերին։
