Հայաստանի հետ հարաբերությունների հաստատումը Թուրքիան Ադրբեջանի հետ է կապում: Այս մասին Հայաստանի վարչապետ Նիկոլ Փաշինյանը հայտարարել է ԵԽԽՎ-ում՝ պատասխանելով Վեհաժողովի պատվիրակներից մեկի՝ Թուրքիայի եւ Ադրբեջանի հետ հարաբերությունները զարգացնելու մասին հարցին:
«Ցավոք, մենք Ադրբեջանի եւ Թուրքիայի հետ դիվանագիտգական հարաբերություններ չունենք: Եվ եթե Ադրբեջանի հետ հարաբերությունների հարցում ամեն ինչ պարզ է, ապա Թուրքիայի դեպքում պատկերը փոքր-ինչ այլ է»,- նշել է Փաշինյանը:
Վարչապետի խոսքով՝ Հայաստանի հետ հարաբերությունների հաստատումը Թուրքիան անմիջականորեն կապում է Ադրբեջանի հետ: «Հայաստանն այս հարցում իր դիրքորոշումը չի փոխել: Մենք ասել ենք, որ պատրաստ ենք Թուրքիայի հետ հարաբերություններ հաստատել առանց որեւէ նախապայմանի»,- հավելել է վարչապետը:
Փաշինյանը նշել է, որ հայկական կողմը հարեւանների հետ հարաբերությունների զարգացումը պատկերացնում է միայն խաղաղ հունով: «Ես ուրախ եմ, որ մեր կառավարությունը կարողացել է բանակցությունների սեղանին դնել բացառապես խաղաղության օրակարգը»,- եզրափակել է Փաշինյանը:
