Հայաստանի եւ Ադրբեջանի ղեկավարների նախաձեռնությունը, որը բարձրաձայնվել է Վիեննայում հանդիպման ժամանակ, առաջին հերթին պետք է գնահատեն ղարաբաղյան հակամարտության կարգավորման գործընթացում ներգրավված երկրները։ Այս մասին այսօր, ապրիլի 11-ին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Ճեպազրույցի ընթացքում ղարաբաղյան «Ազատ հայրենիք» կուսակցության առաջնորդ Արայիկ Հարությունյանը դիմել է Զախարովային՝ խնդրելով գնահատել կողմերի մարդասիրական նախաձեռնությունը, որի մասին խոսվել է Վիեննայում։ Առաջին հարցը վերաբերում էր միջազգային չվեչթների համար Ղարաբաղի օդային տարածքի բացմանը, երկրորդը՝ Սարսանգի ջրամբարի պաշարների համատեղ օգտագործմանը։
«Կարո՞ղ է արդյոք դա մոտեցնել կողմերին հակամարտության լուծմանը»,- հարցրել է Արայիկ Հարությունյանը։
«Ես կարծում եմ, որ առաջին հերթին այդ նախաձեռնությունը, ինչպես եւ բոլոր մյուսները, անկասկած, պետք է գնահատեն այն երկրները, որոնք ներգրավված են հակամարտության կարգավորման մեջ։ Այնուհետեւ, եթե անհրաժեշտ լինի կա՛մ այլ երկրների, կա՛մ ԵԱՀԿ համանախագահող երկրների մասնակցությունը, այդ հարցը նույնպես կարող է դիտարկվել։ Կարծում եմ, որ առաջիկայում Մոսկվայում կայանալիք հանդիպման ընթացքում ե՛ւ այդ, ե՛ւ մյուս հարցերը դիտարկելու լավ հնարավորություն կլինի»,- Հարությունյանի խոսքերը մեկնաբանել է Զախարովան։
Հիշեցնենք, որ այսօր ՌԴ ԱԳՆ-ը հաստատել է ապրիլի 15-ին, Մոսկվայում եռակողմ՝ Հայաստանի, Ադրբեջանի եւ Ռուսաստանի ԱԳՆ ղեկավարնեորի հանդիպման անցկացումը։
