Բուխարեստում, Ռումինիայի խորհրդարանի կողմից կազմակերպված Եվրոպայի ներկա եւ ապագա խնդիրներին վերաբերող խորհրդաժողովում մենք ներկայացրեցինք Հայաստանի եւ ԵՄ-ի զարգացման հեռանկարների մեր տեսլականը: Այս մասին, այսօր՝ ապրիլի 12-ին, լրագրողների հետ հանդիպման ժամանակ նշել է ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանը:
«Ես շեշտադրում արեցի, որ Հայաստանն արդեն սկսել է բարեփոխումները, որոնց մեծ մասը համընկնում է այն օրակարգի հետ, որը ԵՄ-ն մեզ հետ ուներ: Հայաստանը դա անում է ոչ թե ավելի խրախուսանք ստանալու համար, այլ մեր քաղաքացիների պահանջից ելնելով: Դա մեր տեսլականն է եւ ԵՄ-ն կարող է մասը լինել այդ բարեփոխումների: ԵՄ-ն բացառիկ հնարավորություն ունի այս պատմական շրջանում մասնակցել ՀՀ-ում տեղի ունեցող բարեփոխումներին, որոնք այսպես թե այնպես տեղի են ունենալու, պարզապես ԵՄ-ն կարող է դրանք արագացնել: ԵՄ-ն իր աջակցությամբ կարող է բարեփոխումների տեմպերն արագացնել, ծավալը մեծացնել»,-ասաց Եղոյանը:
Նա ընդգծեց, որ ԵՄ-ն ունի 20 առաջարկներ կամ ուղերձներ «Արեւելյան գործընկերության» երկրներին ամենատարբեր ոլորտներին վերաբերող: «Հեղափոխությունից հետո Հայաստանը առնվազն դրանց կեսի մասով մեծ աշխատանք է կատարել: Մասնավորապես, կոռուպցիայի դեմ պայքարում, մամուլի, խոսքի ազատության հարցերում, հավաքների ազատության հարցերում»:
Հանձնաժողովի նախագահը հիշեցրեց, որ դեռեւս դեկտեմբերին Եվրոպական հանձնաժողովի հարեւանության քաղաքականության եւ ընդլայնման բանակցությունների հարցերով ԵՄ հանձնակատար Յոհաննես Հանը հրապարակել էր մի փաստաթուղթ, որով նախատեսվում է մոտ 13 մլրդ եվրոյի ծրագիր իրականացնել Արեւելյան գործընկերության» 6 երկրներում՝ մի մասը գրանտային, մի մասը վարկային, մի մասը տեղական միջոցներով: Հայաստանի բաժինը 730 մլն եվրո է: «Այստեղ կարեւոր ծրագիր է Սիսիան-Քաջարան ավտոճանապարհի կառուցումն է, որը ներառում է մի քանի թունելներ, մի քանի կամուրջներ: Ունենք նաեւ ջրամբարների հարցը, Սեւանա լճի եւ Հրազդանի կիրճի էկոմիջավայրի մաքրման հարցը, դպրոցաշինության հարցը: 13 կետերից բաղկացած ծրագիր է ներկայացվել»,-ասաց Եղոյանը: