Բաղրամյանի անվան զորավարժարանում կայացած հայ-ռուսական երկկողմ գումարտակային մարտավարական զորավարժությունների օդային փուլը բարձր մակարդակում է անցել: Լրագրողների հետ զրույցում նման գնահատական է տվել ավիացիոն բազայի հրամանատար Ալեքսանդր Պետրովը:
«Զորավարժությունների օդային փուլը շատ բարձր մակարդակում է անցել եւ բարձր է գնահատվել ինչպես ՊՆ-ի, այնպես էլ 102-րդ բազայի հրամանատարության կողմից», - ասել է Պետրովը: Նրա խոսքով՝ ավիացիան զորավարժությունների ընթացքում երկու առաջադրանք է կատարել:
«Կործանիչ ավիացիոն էսկադրիլի օդաչուները զորավարժարանի տարածքում օդային տարածքի պաշտպանության մանեւրներ էին զարգացնում եւ օդային մարտի բռնվեցին հակառակորդի հետ, որը փորձում էր հարված հասցնել բազայի դիրքերին: Հիմնական խնդիրն էր ցուցադրել «ՄիԳ -29» ինքնաթիռի հնարավորությունները նման առաջադրանքների կատարման ժամանակ», - եզրափակել է ավիաբազայի հրամանատարը:
Երկրորդ էսկադրիլի անձնակազմը, թռիչքներ իրականացնելով «Մի– 8» եւ «Մի – 24» ուղղաթիռներով, կատարել է հայտնաբերված ցամաքային թրիախների խոցման հիմնական առաջադրանքները:
«Ձախ թեւը պաշտպանում էին Հայաստանի օդաչուները, աջ թեւում աշխատում էին Ռուսաստանի օդաչուները: Շատ տեսարժան եւ շատ որակյալ աշխատանք է:
Պիլոտաժի այնպիսի ֆիգուրների կատարմամբ ինչպիսիք են բլուրը, վայրասլաց թռիչքը եւ վայրասլաց թռիչքից ցամաքային թիրախի խոցումը: Այս էլեմենտը կատարել են ռուս օդաչուները եւ պաշտպանության նախարարն ուշադրություն դարձրեց դրան: Կարծում եմ մյուս զորավարժություններին հայ օդաչուները նույնպես կկատարեն այդ էլեմենտը: Հայկական ավիացիան շատ լավ էր նայվում, հատկապես զույգով երկու «Մի – 24»-ով հրաձգության կատարման ժամանակ», - նշել է Պետրովը:
