ԱՄՆ-ի գլխավոր դատախազ Ուիլյամ Բարը ներկայացրել է «Ռռուսական գործի» հետաքննության արդյունքներով հատուկ դատախազ Ռոբերտ Մյուլլերի զեկույցի ամբողջական տեքստը, հաղորդում է «Ամերիկայի ձայնը»:
Բարը խոստովանել է, որ ռուս գործակալները միջամտել են 2016-ին ԱՄՆ նախագահի ընտրություններին, սակայն մանրամասնել, որ այդ մարդիկ կապված չեն եղել ոչ նախագահ Դոնալդ Թրամփի, ոչ նրա շտաբի հետ:
Գլխավոր դատախազը նշել է, որ Մյուլլերը որեւէ ապացույց չի գտել, որ Թրամփի նախընտրական շտաբի հետ կապված որեւէ մեկը Ռուսաստանի կառավարության կամ ինտերնետային հետազոտությունների ռուսական գործակալության հետ պայմանավորվածություններ է ունեցել կամ նրանց հետ համակարգել է իր գործողությունները:
Գլխավոր դատախազը հայտարարել է, որ նա եւ Ռոդ Ռոզենսթայնը համաձայն չեն արդարադատության խոչընդոտման մասին Մյուլլերի եզրակացությունների հետ:
Նա նշել է, որ Մյուլլերի զեկույցը հաստատում է այն փաստը, որ Ռուսաստանի կառավարությունը ձգտել է միջամտել 2016 ընտրություններին:
Բարը նշել է, որ Մյուլլերը չի հայտնաբերել, որ որեւէ մեկը ապօրինի կերպով տարածել է էլեկտրոնային նամակներ, որոնք համակարգչային խափանման արդյունքում հրապարակային են դարձել:
Գլխավոր դատախազը նշել է, որ Մյուլլերի զեկույցը պատմում է տասը դրվագների մասին, որոնք կապ ունեն Թրամփի հետ եւ դիտարկում է այն հարցը, թե արդյոք կարելի է դրանք որակել որպես խոչընդոտ արդարադատությանը:
Բարի խոսքով, նա դիտարկել է Թրամփի գործողությունների վերաբերյալ հատուկ դատախազի զեկույցում առկա մանրամասները: Գլխավոր դատախազը նշել է, որ նախագահ Թրամփը զայրացած եւ մտահոգված էր հետաքննությամբ` կարծելով, որ այն առաջացել է տեղեկատվության անօրինական արտահոսքից:
Բարը արձանագրել է, որ Սպիտակ տունը ողջ ծավալով համագործակցել է Մյուլերի գլխավորությամբ անցկացվող հետաքննության հետ:
Բարը նշել է, որ մինչեւ հրապարակումը զեկույցի խմբագրված տեքստի հետ ծանոթանալու հնարավորությունը տրվել է նախագահի անձնական իրավաբանին:
