Իրանից էժան ցեմենտի եւ կլինկերի ներկրումը կնպաստի շուկայում մրցակցության հաստատմանը եւ կբերի շինարարական բումի շինանյութի այս տեսակի էժանության հաշվին: Այս մասին ապրիլի 19-ին ԱԺ նիստում «Պետական տուրքի մասին» եւ «Գործունեության իրականացումն իրազեկելու մասին» օրենքներում լրացումներ կատարելու մասին օրինագծերի փաթեթի քննարկման ժամանակ ասաց «Իմ քայլը» դաշինքի պատգամավոր Հայկ Սարգսյանը:
Նրա կարծիքով՝ սա կնպաստի երկրի տնտեսության ամրապնդմանը եւ զարգացմանը, ինչը իշխանությունների համար պետք է առաջնային նշանակություն ունենա: Ընդ որում՝ նա նշեց, որ ցեմենտի հայկական շուկայում առայժմ գերակշռում են տեղական արտադրողները: «2018 թվականի տեղական արտադրությունն աճել է 53 տոկոսով: Հայկական շուկայում 680 հազար տոննայից 512 հազարը կազմել է հայկական ցեմենտը, իսկ 168 հազարը եղել է ներկրած: Այսինքն՝ ցեմենտի 75 տոկոսը բաժին է ընկնում հայ արտադրողներին, իսկ 25 տոկոսը՝ մնացյալին»,- պարզաբանեց Սարգսյանը:
Պատգամավորը նշեց, որ տեղական ձեռնարկությունների ցեմենտի արժեքը փաստացի 4 անգամ գերազանցում է իրանական ցեմենտի արժեքը, իսկ այն հայտարարությունները, թե իրանական ցեմենտի արտադրությունը տեղացի արտադրողների համար զգալիորեն ավելի էժան է, քան նրանց հայ գործըկերների համար է, փոքր-ինչ չափազանցված համարեց:
Սարգսյանը շեշտեց, որ եթե հայ արտադրողներն իրենց արտադրության արդիականացում կատարեին, դա զգալիորեն կբարձրացներ ցեմենտի որակը եւ կնվազեցներ արտադրական ծախսերը, սակայն այդպես էլ չարվեց: «Իրանից էժան ցեմենտի եւ կլինկերի ներկրումը բխում է մեր համաքաղաքացիների մեծամասնության շահերից»,- եզրափակեց Հայկ Սարգսյանը:
Հիշեցնենք, որ տնտեսական հարցերի խորհրդարանական մշտական հանձնաժողովում քննարկվել է մի օրինագիծ, որի համաձայն՝ առաջարկվում է 22000 դրամ մաքսատուրք սահմանել ներկրվող ցեմենտի մեկ տոննայի համար։ Նշվել է, որ օրենքի ընդունումը հնարավորություն կտա կիրառել սահմանափակումներ այնպիսի ապրանքների վրա, որոնք կարող են արտադրվել երկրում։ Դրանով իսկ կարելի կլինի խրախուսել տեղական արտադրությունը՝ օգտագործելով եւ զարգացնելով առկա հնարավորությունները։ Ընդունված է կարծել, թե սա նախագիծ է, որը պաշտպանում է Գագիկ Ծառուկյանի ցեմենտի գործարանի գործունեությունը։ Ինքը՝ «Արարատցեմենտի» սեփականատերը, անիմաստ է համարում տուրք մտցնելը, եթե այն չի վերաբերելու նաեւ ցեմենտի հումքի արտադրությանը։
