Մեծ Բրիտանիայի կիբեռանվտանգության ազգային կենտրոնը կազմել է ամենաանվտանգ նշանաբառերի ցանկը, որոնք օգտագործում են ինտերնետ օգտատերերը իրենց աքաունթների պաշտպանության համար։ Հետազոտության արդյունքները հրապարակվել են կենտրոնի պաշտոնական պորտալում, տեղեկացնում է ՌԻԱ «Նովոստի»-ն։
Ամենախոցելի նշանաբառերը որոշելու համար մասնագետները վերլուծել են հանրային տվյալների շտեմարանները, որոնցում պարունակվել է 100 հազար նշանաբառերի մասին տեղեկատվություն, որոնք օգտագործվել են կիբեռհանցագործների կողմից այլոց գրառումները կոտրելու համար։
Ցուցակում առաջին տեղը զբաղեցրել է «123456»-ը, որն օգտագործում է 23 միլիոն մարդ։ Երկրորդ տեղում «123456789»-ն է, որն ընտրել է 7,7 մլն օգտատեր։ Երրորդը «qwerty»-ն է (3,8 մլն մարդ), չորրորդը՝ password-ը՝ 3,6 մլն, հինգերորդը՝ 1111111 (3,1 միլիոն)։
Նշվում է, որ շատ օգտատերեր ընտրում են իրենց անունը որպես նշանաբառ, ֆուտբոլային ակումբների, երաժշտական խմբերի անունները։
«Չարժե գաղտնի տվյալները պաշտպանել՝ օգտագործելով այն, ինչը կարելի է կռահել. օրինակ՝ սեփական անունը, տեղի ֆուտբոլային թիմի կամ սիրելի խմբի անունը»,- նախազգուշացրել են հետազոտության հեղինակները։
Փետրվարին ռուսական InfoWatch ընկերությունը (մասնագիտանում է տեղեկատվական անվտանգության ոլորտում) գրանցել է ինտերնետ-օգտատերերի տվյալների մեծ արտահոսք, որի ընթացքում հաքերները հրապարակել են 2,2 մլրդ եզակի լոգիններ եւ նշանաբառեր։ Ընկերության վերլուծաբանների կարծիքով՝ գաղտնի տեղեկատվությունը, որը հայտնվել է ցանցում, կարող էր ստացվել տարբեր ժամանակներում կոտրումների հետեւանքով։