Եգիպտոսի ընտրական հանձնաժողովը հայտարարել է, որ ընտրողները հավանություն են տվել սահմանադրական բարեփոխումներին, որոնք երկրի նախագահ Աբդել-Ֆաթահ ալ Սիսիին թույլ կտան մինչեւ 2030 թվականը իշխանության մնալ, փոխանցում է AP-ն:
Հանձնաժողովի ղեկավար Լաշին Իբրահիմը հայտարարել է, որ բարեփոխումները հավանություն են ստացել, եւ ընտրողների 88,83 տոկոսը կողմ է քվեարկել: Ընտրողների մասնակցությունը կազմել է 44,33 տոկոս: Համազգային հանրաքվեն ընթացել է 3 օր, շաբաթից մինչեւ երկուշաբթի՝ ընտրողների առավելագույն մասնակցություն ապահովելու համար:
Կառավարամետ լրատվամիջոցները, բիզնեսմենները եւ օրենսդիրները ձգտում էին հասնել բարեփոխումների աջակցությանը: Իշխանությունները սպառնացել էին տուգանել ցանկացածին, ով քվեարկությունը կբոյկոտի:
