2019 թվականի ապրիլի 24-25-ին Բելգիայի Ներկայացուցիչների պալատն իր լիագումար նիստերում քննարկել եւ ընդունել է օրենք, որն այլ հարցերի թվում նախատեսում է նաեւ պատիժ այնպիսի ցեղասպանությունների ժխտման համար, ինչպիսին են Ռուանդայի ցեղասպանությունը եւ զանգվածային սպանությունները Սրեբրենիցայում։
Չնայած Բելգիայի հայ համայնքի եւ խորհրդարանի մի քանի անդամների, ինչպես նաեւ ոլորտի մասնագետների ջանքերին, ընդունված տեքստը չի նախատեսում պատիժ Հայոց ցեղասպանության ժխտման համար։ Այս մասին տեղեկացնում է Եվրոպայում «Հայ Դատի» գրասենյակը։
Ինչպես նշվում է հայտարարությունում, փաստորեն, Բելգիան պաշտոնապես ճանաչել է Հայոց ցեղասպանությունը երեք մակարդակում՝ Ներկայացուցիչների պալատ, Սենատ եւ կառավարություն, վարչապետ Չառլզ Միշելի պաշտոնական հայտարարությամբ։
«Բելգիական խորհրդարանի որոշումը՝ օրենքից Հայոց ցեղասպանության բացառման մասին, անընդունելի է եւ խորապես հուսահատեցնող»,- ասել է «Հայ Դատի» գրասենյակի տնօրեն Կասպար Կարամպետյանը։
Նրա խոսքով՝ ափսոս, որ Պալատի ներկայացուցիչների մեծ մասը ուշադրություն չի դարձրել հանրային կարծիքին, բազմաթիվ հոդվածներին, որոնք հրապարակվել են բելգիական առաջատար ԶԼՄ-ներում, իրավապաշտպանների պահանջներին եւ խորհրդարանականների մտցրած լրացումներին։
Կարամպետյանը ընդգծել է, որ հանդուրժողությունը եւ ժխտումը ոգեւորում են ավտորիտար ռեժիմներին, ինչպիսին է Էրդողաի վարչակարգը եւ, ցավոք, կանաչ լույս վառում այլատյացության, հակահայկական հայտարարությունների առջեւ։
