Ամերիկյան Մերիլենդ նահանգի Բալթիմոր քաղաքի իշխանությունները կոչ են անում վկաներին փոխանցել ցանկացած տեղեկատվություն հրաձիգի մասին, որը կիրակի օրը կրակ է բացել զբոսնող մարդկանց բազմության վրա՝ հայտնում է Associated Press-ը։
Միջադեպի հետեւանքով սպանվել է մեկ մարդ, յոթը վնասվածքներ են ստացել։
Ոստիկանության կոմիսար Մայքլ Հարիսոնը հայտնել է, որ հրաձգությունը սկսվել է տեղի ժամանակով 17։00-ից հետո, քաղաքի արեւմտյան բնակելի թաղամասում։ Տղամարդը մոտեցել է ամբոխին եւ սկսել է կրակել։ Նրա խոսքերով, դա եղել է «շատ ողբերգական, շատ վախկոտ հրաձգություն»։
Ոստիկանության ղեկավարը եւ քաղաքապետ Ջեկ Յանգը կոչ են արել բնակիչներին օգնել քննիչներին գտնելու միջադեպի պատասխանատուներին։
Նշվում է, որ միջադեպը տեղի է ունեցել Բալթիմորի ոստիկանության կոմիսարի պաշտոնում Հարիսոնի նշանակվելուց վեց շաբաթ անց։
Գործակալությունը նշում է, որ վերջին երկու տարիների ընթացքում քաղաքում տարեկան ավելի քան 300 սպանություն է կատարվում։