Էստոնիայի արտաքին առեւտրի եւ տեղեկատվական տեխնոլոգիաների նախարար Մարտի Կուուզիկի դեմ քրեական գործ է հարուցվել։ Նրան կասկածում են ընտանեկան բռնություն կիրառելու մեջ, երեքշաբթի գիշեր տեղեկացրել է երկրի արդարադատության նախարար Ռայվո Ագեն, հաղորդում է ՏԱՍՍ-ը։
«Քանի որ գործ ունենք այդքան լուրջ մեղադրանքների հետ, ինչպես ինձ հայտնի է, քրեական գործ է հարուցվել, որպեսզի ստուգվեն հրապարակված փաստերը,- ասել է նա ETV+հեռուստաալիքին։- Քննությունը վարում է Իդասի ոստիկանության պրեֆեկտուրան՝ Վիրուի օկրուգային դատախազության գլխավորությամբ»։
Վիրուի օկրուգային դատախազության մամուլի քարտուղար Ելենա Ֆիլիպովան հաստատել է, որ քրեական գործը հարուցվել է «Ֆիզիկական բռնության կիրառում» հոդվածով։ Ավելի վաղ էստոնական ԶԼՄ-ները տեղեկացրել էին, որ Կուուզիկը մի քանի տարի բարոյապես եւ ֆիզիկապես ահաբեկել է նախկին կնոջը։
Կուուզիկն ինքը այդ տեղեկությունները անվանել է իր դեմ կազմակերպված տեղեկատվական արշավ։