Թուրքիան չի կարող հեշտությամբ դիվերսիֆիկացնել նավթի ներկրումը՝ հայտարարել է երկրի ԱԳ նախարար Մեւլութ Չավուշօղլուն այն բանից հետո, երբ ԱՄՆ-ը չի երկարացրել իրանական նավթի ներկրման պատժամիջոցներից ազատելու ժամկետը՝ հայտնում է Reuters-ը։
Նա նաեւ ասել է, թե Թուրքիայի նավթավերամշակման գործարանները չեն համապատասխանում այլ երկրների նավթին՝ հավելելով, որ Վաշինգտոնը պետք է վերանայի այդ հարցով իր որոշումը։
Իրանը ամենախոշոր նավթ արտահանողներից է Թուրքիա, որը իր էներգետիկ պահանջները բավարարելու համար համարյա ամբողջովին կախված է ներկրումից։
Ապրիլի 22-ին ԱՄՆ-ը պահանջել էր, որ Իրանի նավթի գնորդները մինչեւ մայիսի 1-ը ավարտեն գնումները, հակառակ դեպքում կբախվեն պատժամիջոցների։ Դրանցից ազատման ժամկետը, որ ստացել են Չինաստանը, Հունաստանը, Հնդկաստանը, Իտալիան, Ճապոնիան, Հարավային Կորեան, Թայվանը եւ Թուրքիան, լրանում է մայիսի 2-ին։