ՕՊԵԿ-ը մտադիր է խուսափել գլոբալ «Էներգետիկ ճգնաժամից», քանի որ նրա որոշ անդամներ բախվում են միջազգային պատժամիջոցներին, իսկ մյուսները պայքարում են անկարգությունների դեմ։ Այս մասին ասել է կարտելի գլխավոր քարտուղար Մոհամեդ Բարկինդոն Թեհրանում նավթագազային ցուցահանդեսի շրջանակում։
«Որպես կազմակերպություն մենք նախկինի պես կենտրոնացած ենք էներգետիկ ճգնաժամից խուսափելու մեր նպատակի վրա, որը կարող է ազդել համաշխարհային տնտեսության վրա»,- ասել է նա, տեղեկացնում է AFP-ը։ Նրա խոսքով, ՕՊԵԿ-ը այդ քաղաքականությունը կիրականացնի՝ «չնայած որոշ անդամ երկրներում ընթացիկ խնդիրներին»։
Նրա մեկնաբանությունները հնչել են ԱՄՆ որոշման ֆոնին՝ չերկարացնել իրանական նավթի պատժամիջոցներից ազատ լինելու ժամկետը։
Վենեսուելան՝ կարտելի մյուս անդամը, նույնպես բախվում է ԱՄՆ պատժամիջոցներին եւ ներքաղաքական ճգնաժամին։
Բարկինդոն չի նշել ոչ մի երկիր, բայց ասել է, որ ՕՊԵԿ որոշ արտադրողներ «ներկայում գտնվում են միակողմանի պատժամիջոցների ներքո»։
Մեկ այլ երկիր «նույնպես անցումային խնդիրներ ունի՝ բոլոր պոտենցիալ հետեւանքներով», ասել է Բարկինդոն՝ հավանաբար նկատի ունենալով Վենեսուելան։ Կարտելի եւս մեկ անդամ «պայքարում է, որպեսզի խուսափի տոտալ պատերազմից»,- նշել է նա՝ նկատի ունենալով Լիբիան։
Ըստ Բարկինդոյի՝ ՕՊԵԿ-ը «ձգտում է մնալ միակը» եւ «չի գլորվում քաոսի մեջ», որի հետ կազմակերպությունը բախվում է վերջին տարիներին։