ՊԵԿ–ը դեռեւս նախորդ տարի իրացված գազի իրական ծավալների խախտումների փաստով ստուգումներ է իրականացրել ԲՀԿ ղեկավար Գագիկ Ծառուկյանի ընտանիքին պատկանող գազալցակայաններում եւ վարչական ակտ նշանակել։ Այս մասին այսօր՝ մայիսի 10–ին կառավարությունում լրագրողների հետ ճեպազրույցում հայտարարեց ՊԵԿ նախագահ Դավիթ Անանյանը։
Հարցին, թե մտավախություն չունի՞, որ ՊԵԿ–ի գործողությունները Գագիկ Ծառուկյանը կարող է որպես քաղաքական հետապնդում մեկնաբանել, Անանյանը պատասխանեց.
«Մեր գործողություննեը որեւէ քաղաքական ենթատեքստ չեն պարունակում եւ պարոն Ծառուկյանի ընտանիքին պատկանող գազալցակայանների վերաբերյալ դեռեւս նախորդ տարի ենք գործողություններ իրականացրել։ Ծառուկյանին պատկանող գազալցակայանը այն 33 կազմակերպությունների թվում է, որոնց վերաբերյալ մենք մեր ակտերը դեռեւս անցյալ տարի ենք ամփոփել եւ պարոն Ծառուկյանին պատկանող կազմակերպությունների մենեջմենթը իրենց իրավասության շրջանակներում բողոքարկել են եւ այժմ դատական պրոցես է ընթանում»։
Հիշեցնենք, որ իրացված գազի իրական ծավալների խախտումների փաստով հարուցված քրեական գործի շրջանակներում ՊԵԿ–ը հարկային ստուգումներ է իրականացրել գազալցակայաններում եւ 33 ընկերությունների նկատմամբ 22 մլրդ դրամի լրացուցիչ հարկային պարտավորություն դրել։
