Արաբկիր վարչական շրջանում մայիսի լույս 7-ի գիշերը ավազակային հարձակում էր կատարվել: Դրա մասին ոստիկանություն ահազանգել է Կոմիտասի պողոտայում գտնվող սուպերմարկետներից մեկի աշխատակիցը: Նրա փոխանցմամբ՝ բժշկական դիմակով դեմքը քողարկած և ձեռնոցներով մի երիտասարդ մտել է սուպերմարկետում գործող տարադրամի փոխանակման կետ, դանակով և նռնակի նմանվող առարկայով սպառնացել ու գումար պահանջել: Հարձակվողի պահանջները չէին կատարել և նա, ոչինչ չստանալով, փախել էր: Այս մասին NEWS.am-ը տեղեականում է ՀՀ ոստիկանւոթյան պաշտոնական կայքից։
Դեպքի առթիվ տարածքային նախաքննական մարմնում քրեական գործ հարուցվեց: Արաբկիրի ոստիկանները սկսեցին հետախուզական լայնածավալ միջոցառումները՝ հանցագործությունը կատարած անձին հայտնաբերելու ուղղությամբ:
Դեպքի հաջորդ օրը՝ մայիսի 8-ին, քրեական հետախույզները ոստիկանության Արաբկիրի բաժին բերման ենթարկեցին իրենց օպերատիվ տեսադաշտում հայտնված երևանաբնակ մի երիտասարդի:
Բերման ենթարկվածին ոստիկանները ներկայացրին դեպքի նախաքննությունը վարող քննչական բաժին, որտեղ նա որպես կասկածյալ ձերբակալվեց:
Ոստիկանության և քննչական կոմիտեի ծառայողները շարունակում են հետախուզական միջոցառումներն ու քննչական գործողությունները ՝ դեպքի բոլոր հանգամանքները պարզելու, ինչպես և հանցագործության գործիք դանակն ու նռնականման առարկան հայտնաբերելու ուղղությամբ: Կատարվում է նախաքննություն:
