Ազգային ժողովում 2018թ.-ի բյուջեի կատարողականի քննարկմանը այսօր՝ հունիսի 11-ին, չէր ներկայացել Աշխատանքի եւ սոցիալական հարցերի նախարար Զարուհի Բաթոյանը: Զարուհի Բաթոյանի փոխարեն բյուջեի կատարողականի հաշվետվությունը ներկայացրեց փոխնախարար Սմբատ Սաիյանը:
ԱԺ ֆինանսավարկային եւ բյուջետային հարցերի մշտական հանձնաժողովի նախագահ, «Լուսավոր Հայաստան» խմբակցության պատգամավոր Մանե Թանդիլյանը Սմբատ Սաիյանին խնդրեց փոխանցել նախարարին, որ 1 ամիս առաջ իրենց ժամկետացանկը ուղարկել են միայն այն պատճառով, որ բոլոր նախարարները կարողանան իրենց գրաֆիկներում տեղ հատկացնել այսօրվա քննարկումներին.
«Վարչապետի հրահանգով, եւ առհասարակ՝ բյուջեի քննարկմանը, պետք է ներկայանան նախարարները: 1 ամիս առաջ ենք տեղեկացրել՝ միայն նրա համար, որպեսզի նախարարները կարողանան տեղ հատկացնել սրան»,- ասաց Թանդիլյանը:
Սմբատ Սաիյանն էլ իր հերթին հայտնեց Թանդիլյանին, որ նախարար Բաթոյանը գործուղման է մեկնել: