ՀՀ հսկայական զբոսաշրջային պոտենցիալը դեռ մնում է չօգտագործված։ Այս մասին հուլիսի 1-ին լրագրողների հետ հանդիպմանն ասել է «Սլայս» զբոսաշրջային գործակալության հիմնադիր Նանե Մաթեւոսյանը։
Նրա խոսքով՝ հիմնական խնդիրն այն է, որ Հայաստանի մասին տեղեկությունն այնքան էլ շատ չէ, եւ դա չնայած այն հանգամանքին, որ վերջին ժամանակներս որոշակի ներդրումներ են արվում, այդ թվում գովազդային ոլորտում։ Նանե Մաթեւոսյանը հավելել է, որ զբոսաշրջիկների հիմնական հոսքը Հայաստան ռուսաստանցիներն են կազմում, ինչպես նաեւ Չինաստանի, Եվրոպայի եւ Ուկրաինայի զբոսաշրջիկները։ Նա ընդգծել է, որ առայժմ վաղ է ինչ-որ եզրակացություններ անել, թե ինչպես կանդրադառնա Հայաստան ռուսաստանցի զբոսաշրջիկների հոսքի վրա ռուս-վրացական հարաբերությունների իրավիճակը, սակայն որոշակի փոփոխություններ, այնուամենայնիվ, կարող են լինել։
«Հիմնական ուղղությունները հայ զբոսաշրջիկների համար շարունակում են մնալ Եգիպտոսը, Հունաստանը եւ Վրաստանը։ Ընդ որում՝ հայ զբոսաշրջիկը, շաբաթը միջինը 500-1000 դոլար ծախսելով մեկ մարդու հաշվով, կարող է արժանի հանգիստ կազմակերպել արտասահմանում»,- ամփոփել է Նանե Մաթեւոսյանը։