ԵԽԽՎ-ի օրակարգում՝ ո՛չ լիագումար նիստերին, ո՛չ հանձնաժողովների նիստերին Հայաստանի Սահմանադրական դատարանի շուրջ ստեղծված իրավիճակին առնչվող հարց չի քննարկվել: Այս մասին այսօր՝ հուլիսի 1-ին, լրագրողների հետ հանդիպմանն ասաց «Իմ քայլը» խմբակցության պատգամավոր Վլադիմիր Վարդանյանը։
«Վենետիկի հանձնաժողովի կայացրած որոշումը, որում նախատեսվում է անդրադառնալ անհրաժեշտության դեպքում Հայաստանում Սահմանադրական դատարանի շուրջ ստեղծված իրավիճակին, ծանոթ եմ, այն հասանելի է նաեւ մամուլին, բայց որեւէ դիրքորոշում այդ հարցի վերաբերյալ չկա»,-նշեց նա։
Վահե Գրիգորյանի նամակի մասին հարցին պատգամավորը պատասխանեց, որ նամակին ծանոթ է մամուլից, չի հասցրել մանրամասն ուսումնասիրել, որպեսզի դիրքորոշում արտահայտի։
ԲՀԿ-ական պատգամավոր Նաիրա Զոհրաբյանը հարցի առնչությամբ նշեց, որ խնդիրը քննարկել են Վենետիկի հանձնաժողովի փորձագետներից մեկի հետ. «Այո, խնդիրը բավականին լուրջ է, իրենց մտահոգությունն է, կարծում եմ, նաեւ մեր մտահոգությունն է, որ խնդիրը չպետք է լուծվի քաղաքական դաշտում»:
Նա հավելեց, որ դատական հարցերը չպետք է լուծվեն քաղաքական հարթության մեջ․ «ՀՀ սահմանադրական եւ իրավաբանական միտքը բաժանվել է երկու ճամբարի, ինչը բացարձակ անընդունելի է։ Այս հարցը չպետք է լուծվի քաղաքական հարթության մեջ, եւ քանի դեռ հարցը գտնվում է քաղաքական հարթության մեջ, իսկ հարցը գտնվում է քաղաքական հարթության մեջ, այն չի ունենալու իրավական ճշգրիտ լուծում: Ես չլսեցի որեւէ սահմանադրագետի, որեւէ իրավաբանի կարծիք, որը չլինի քաղաքականացված: Եվ, այո, Վենետիկի հանձնաժողովի նշյալ փորձագետը, որը, կարծում եմ, իրավասություն ուներ խոսել նաեւ Վենետիկի հանձնաժողովի անունից, ուներ մտավախություն, որ խնդիրը չպետք է լուծվի քաղաքական հարթության մեջ»:
Վահե Գրիգորյանը նամակի մասին Զոհրաբյանը նշեց, որ ամբողջությամբ չի հասցրել ծանոթանալ, բայց հավելեց, որ խնդիրը պետք է լուծվի բացառապես սահմանադրական իրավունքի եւ ՀՀ Սահմանադրության շրջանակներում, եւ ոչ թե՝ քաղաքական օրվա կուրսի շրջանակներում: