ՀՀ Շիրակի մարզի դատախազ Կ. Գաբրիելյանը մարզում արձանագրված ճանապարհատրանսպորտային խախտումների, դրանց պատճառների եւ նպաստող պայմանների վերացման ուղղությամբ միջոցառումներ ձեռնարկելու միջնորդագրով դիմել է ՀՀ «Ճանապարհային ոստիկանություն»   ծառայության    պետին:

Ըստ մարզի դատախազությունում կատարված ուսումնասիրությունների՝ 2019թ. առաջին կիսամյակում Շիրակի մարզի տարածքում ճանապարհային երթեւեկության կանոնների հանցավոր խախտման 72 դեպք է արձանագրվել, որոնցից 5-ը՝ 5 անձանց մահվան ելքով: Մարմնական վնասվածք է ստացել 108 անձ։

Խախտումները եղել են տարաբնույթ: Մասնավորապես՝ արձանագրվել է ոչ սթափ վիճակում ավտոմեքենա վարելու 5 դեպք՝  2018թ. առաջին կիսամյակում արձանագրված 3 դեպքի դիմաց: Դրանց հետեւանքով 7 անձ ստացել է տարբեր բնույթի մարմնական վնասվածքներ, ինչը ավելի քան երկու անգամ ավելի է նախորդ տարվա համեմատ: Արագության գերազանցման 22 դեպք է արձանագրվել, ինչը կրկնակի ավելի է նախորդ տարվա նույն ժամանակահատվածի համեմատ, որի հետեւանքով 2 դեպքով 2 անձ մահացել է, իսկ 31-ը՝ ստացել տարբեր աստիճանի մարմնական վնասվածքներ։

Մարդկանց փոխադրման կանոնների խախտմամբ 1 դեպք է արձանագրվել, որի հետեւանքով 1 անձ ստացել է մարմնական վնասվածք, այն դեպքում, երբ 2018թ. նույն ընթացքում նման դեպք չի արձանագրվել։

Ուսումնասիրությունները  փաստել են նաեւ, որ Գյումրի քաղաքը սպասարկող երթուղու միկրոավտոբուսների եւ ավտոբուսների վարորդները, հաճախակի խախտելով «Ճանապարհային երթեւեկության անվտանգության ապահովման» մասին ՀՀ օրենքի, ինչպես նաեւ «Ճանապարհային երթեւեկության կանոնների» պահանջները, ստեղծում են վթարային իրադրություններ, վթարներ, ինչի հետեւանքով լրջորեն վտանգվում է թե´ հետիոտների, եւ թե´այլ վարորդների ու ուղեւորների անվտանգությունը:

Մարզի քաղաքների՝ հատկապես կենտրոնական փողոցներում արձանագրվում են առերեւույթ կոպիտ իրավախախտումներ, երբ կարգազանց վարորդները երթեւեկում են բարձր արագությամբ, շատ դեպքերում նշված հատվածներում իրար մեջ ստեղծելով մրցակցություն՝ փորձարկում են իրենց ավտոմեքենաների արագությունը։

ՃՏՊ-ներով դեպքերը պայմանավորված են նաեւ վարչական իրավախախտումների նախականխման եւ կանխման ուղղությամբ գործուն միջոցներ չձեռնարկվելու, ՃՈ վերակարգերը ոչ արդյունավետ տեղաբաշխելու, ինչպես նաեւ երեկոյան եւ գիշերային ժամերին թույլ հսկողություն իրականացնելու, առավել հաճախ արձանագրված ՃՏՊ վայրերում ուժեղացված եւ համակարգված ծառայություն չիրականացնելու, խախտումներ թույլ տված յուրաքանչյուր անձի նկատմամբ վարչական ներգործության խիստ միջոցներ չձեռնարկելու  հանգամանքներով:

Դեռեւս այս տարվա մարտին ՀՀ Շիրակի մարզի դատախազությունը ՀՀ Ոստիկանության «Ճանապարհային ոստիկանություն» ծառայության ուշադրությունն է հրավիրել նշված հանգամանքների վրա: Առաջարկվել էր, ի թիվս նախականխմանն ուղղված այլ միջոցառումների, Գյումրի քաղաքում անցկացնել ստուգայց եւ իրականացնել մեկօրյա չնախատեսված ու անակնկալ ուժեղացված ծառայություն։ Չնայած անցել է տեւական ժամանակ, սակայն մտահոգության տեղիք տվող խնդիրների լուծման ուղղությամբ բավարար գործուն ջանքեր չեն գործադրվել:

Նման դեպքերն արձանագրելու եւ կարգազանց վարորդներին վարչական պատասխանատվության ենթարկելու նկատառումներից ելնելով երբեմն անմիջական միջամտություն են ցուցաբերում Շիրակի մարզի դատախազության աշխատակիցները:

Հաշվի առնելով վերոնշյալը, մարզի դատախազ Կ. Գաբրիելյանը ՃՈ պետին միջնորդագիր է հասցեագրել՝ մարզի տարածքում ՃՈ գործուն եւ արդյունավետ միջոցներ ձեռնարկելու, մարզի տարածքում ՃՈ ծառայությունն ուժեղացնելու, դրա որակն էապես բարելավելու, առկա իրավախախտումները բացառելու եւ կարգազանց վարորդների նկատմամբ խիստ վարչաիրավական ներգործության միջոցներ կիրառելու համար։

Բացի այդ, մարզի դատախազի կողմից մարզի դատախազության դատախազների առջեւ խնդիր է դրվել, ելնելով այս ոլորտում գլխավոր դատախազության որդեգրած քրեական քաղաքականությունից, բոլոր այն դեպքերում, երբ արձանագրվում է ճանապարհատրանսպորտային երթեւեկության կանոնների կոպիտ խախտման արդյունքում առաջացած մահ կամ ծանր հետեւանքներ, քրեաիրավական ներգործության միջոցների կիրառման, ինչպես նաեւ պատժի որոշման հարցում դրսեւորել առավել խիստ մոտեցում։