CNN Հունաստանը հրապարակել է հոդված Հայաստանի մասին տեղեկատվական տեխնոլոգիաների վերաբերյալ WCIT 2019 համաշխարհային կոնգրեսի նախօրեին:
Զեկույցի հեղինակ Կոստաս Փլիաքոսի խոսքով՝ ԽՍՀՄ ժամանակաշրջանում Հայաստանը տեղեկատվական տեխնոլոգիաների կենտրոնն է եղել, իսկ հետո վերածվել է Հարավային Կովկասի Սիլիկոնյան հովտի:
Հեղինակը նշել է, որ տասը տարվա ընթացքում Հայաստանը մտել է նոր տեխնոլոգիաների ոլորտ, ընդ որում՝ ոչ միայն աութսորսինգի առումով, այլ նաեւ որպես նոր գաղափարներ, հավելվածներ եւ պրոդուկտ արտադրող:
Ըստ աղբյուրի՝ Հայաստանը երկիր է, որտեղ կան ամենամեծ թվով կին ՏՏ մասնագետները (33 տոկոս):
Լրագրողները նաեւ այցելել են Երեւանում այնպիսի ՏՏ ընկերություններ, ինչպիսիք են PicsArt-ը, BetConstruct-ը, ԹՈՒՄՈ ստեղծարար տեխնոլոգիաների կենտրոնը եւ ArMath ինժեներական լաբորատորիան, ինչպես նաեւ տեխնոլոգիական կենտրոնն ու COAF Smart կենտրոնը Վանաձորում:
Հիշեցնենք, որ այս տարվա հոկտեմբերին Հայաստանում կկայանա տեղեկատվական տեխնոլոգիաների վերաբերյալ WCIT 2019 համաշխարհային կոնգրեսը: Միջազգային այդ միջոցառմանը, որի կազմակերպիչն է Տեղեկատվական տեխնոլոգիաների եւ ծառայությունների համաշխարհային միությունը (WITSA) Հայաստանի կառավարության աջակցությամբ, կմասնակցեն փորձագետներ տեղեկատվական տեխնոլոգիաների ոլորտից, պաշտոնատար անձինք եւ առաջատար ՏՏ ընկերությունների բարձրաստիճան ներկայացուցիչները: Կազմակերպչական աշխատանքներն անցկացնում է Առաջադեմ տեխնոլոգիական ընկերությունների միությունը:
