Ընկերության տնօրեն Նիկոլաս Թավիլը Հայաստանի իշխանություններին մեղադրում է ընկերությանը սեփականազրկելու մտադրության մեջ: Այս մասին նա հայտարարեց սկայպ տեսակապիվ առցանց մամուլի ասուլիսի ժամանակ:
Ավելի վաղ մամուլի ասուլիսը նախատեսվում էր անցկացնել Թբիլիսիում, սակայն բարձրացված աղմուկից հետո որոշվել էր այն ինտերակտիվ ռեժիմով անցկացնել:
«Թբիլիսիում ասուլիս անցկացնելու գաղափարն առաջացել էր այն պատճառով, որ «Սանիթեքը» ենթարկվում է ագրեսիվ վարչական ճնշման», - ասաց Թավիլը: Նրա խոսքով՝ օրինակներից մեկը այս տարվա փետրվարին «Սանիթեքի» դեմ հարուցված քրեական գործն է:
«Քրեական գործը անհիմն է և անօրինական, բխում է նրանց քաղաքական նկատառումներից»,- հավաստիացրեց Թավիլը՝ հավելելով, որ գործողություններն ուղղված են ընկերության ֆինանսական հնարավորությունների սպառմանը և գույքի օտարմանը:
Միեւնույն ժամանակ, նա հիշեցրեց ավելի վաղ արված հայտարարությունները, որ իշխանությունները պատրաստվում են խզել ընկերության հետ պայմանագիրը, և գործողությունները թելադրված են քաղաքական նկատառումներով:
Ընկերությունը Հայաստանում գործում է 4.5 տարի: Սեփականատերերը Լիբանանից և Կանադայից են:
