Թեհրանը պատրաստ է միջուկային գործարքով իր պարտավորությունների կրճատման երրորդ քայլին անցնելուն, եթե մյուս երկրների կողմից համաձայնագրի կատարման հետ կապված իրավիճակը չփոխվի: Այս մասին հայտարարել է Իրանի նախագահ Հասան Ռոհանին, փոխանցում է ՏԱՍՍ-ը:
«Ինչ վերաբերում է մեր կողմից [միջուկային գործարքով] մեր պարտավորությունների կրճատմանը, ապա մենք կպահպանենք նախկին մոտեցումը: Եթե մեր նշանակած 60-օրյա ժամկետի ավարտին ոչ մի արդյունք չլինի, ապա մենք անպայման կանցնենք [պարտավորությունների կրճատման] երրորդ փուլին»,- նշված է նախագահի կայքում հրապարակված հայտարարության մեջ: Նա հավելել է, որ «այնուհետեւ կտրամադրվի 60-օրյա նոր ժամկետ, որպեսզի գտնվի այս խնդրի լուծումը»:
2019 թվականի մայիսի 8-ին Ռոհանին հայտարարել էր, որ Թեհրանը դադարեցնում է միջուկային գործարքով պարտավորությունների մի մասի կատարումը եւ մյուս մասնակիցներին 60 օր ժամանակ է տալիս դրանց կատարմանը վերադառնալու համար: Հուլիսի 7-ին Թեհրանն անցել էր կասեցման երկրորդ փուլին (հայտարարել էր 3,67 տոկոսից ավելի ուրանի հարստացման մասին) եւ խոստացել յուրաքանչյուր 60 օրը մեկ պարտավորությունները կրճատել, եթե մյուս մասնակիցները չհետեւեն ձեռք բերված պայմանավորվածություններին:
Իրանական միջուկային դոսյեի խնդիրը կտրուկ սրվել էր 2018 թվականի մայիսի 8-ին ՀՀԳԾ-ից միակողմանի կարգով ԱՄՆ-ի դուրս գալուց եւ Իրանի դեմ նավթի արտահանման ոլորտում ամերիկյան տնտեսական պատժամիջոցներ սահմանելուց հետո: Իրանական կողմի վարկածով՝ գործարքի մնացյալ մասնակիցները, առաջին հերթին եվրոպացիները համաձայնագրի տնտեսական մասով իրենց պարտավորություններն ամբողջապես չեն կատարում, ուստի իր ներկայիս տեսքով գործարքն անիմաստ է: