Իտալիայի վարչապետ Ջուզեպպե Կոնտեն Սենատում ելույթ ունենալիս հայտարարել է, որ հանրապետության նախագահին հրաժարականի դիմում կներկայացնի:
«Այսօր ես շատ ուշադիր կլսեմ բոլոր ելույթները, սակայն մտադիր եմ ավարտել այս քաղաքական անցումը՝ հայտարարելով, որ նիստից հետո կուղեւորվեմ հանրապետության նախագահի մոտ եւ նրան կհանձնեմ հրաժարականի դիմումը», - հայտարարել է Կոնտեն, հաղորդում է «ՌԻԱ Նովոստին»:
«5 աստղ շարժման» եւ «Լիգա» կուսակցության կողմից ձեւավորված իշխող կոալիցիան օգոստոսի 8-ին դադարեց գոյություն ունենալ: Այդ ժամանակ փոխվարչապետ եւ «Լիգա» կուսակցության ղեկավար Մատտեո Սալվինին Կոնտեին տեղեկացրել էր դաշնակիցների հետ լուրջ տարաձայնությունների մասին եւ արտահերթ ընտրությունների շտապ անցկացում պահանջել:
Սալվինիի հայտարարության համար առիթ էր հանդիսացել Սենատում Թուրինի եւ Լիոնի միջեւ արագընթաց երկաթուղային ճանապարհի շինարարության հարցով քվեարկությունը: «Լիգայից» պատգամավորները ընդդիմության ներկայացուցիչների հետ կողմ էին քվեարկել խոշորագույն ենթակառուցվածքային նախագծին եւ մերժել բացասական բանաձեւը:
Կոնտեն ստեղծված քաղաքական ճգնաժամի համար մեղադրել է Սալվինիին եւ պահանջել, որ նա իտալացիներին բացատրի կառավարության աշխատանքի դադարեցման պատճառները:
Իտալիայի Սահմանադրության համաձայն՝ խորհրդարանը լուծարելու եւ նոր ընտրություններ նշանակելու իրավունքը պատկանում է հանրապետության նախագահ Սերջո Մատարելային:
