Առաջարկված օրենսդրական փաթեթների էությունը հետեւյալն է. մենք առաջարկում ենք հրաժարվել «արտաբյուջետային միջոցներ» հասկացությունից: Այս մասին այսօր ՀՀ ԱԺ ֆինանսավարկային եւ բյուջետային հարցերով մշտական հանձնաժողովի նիստի ժամանակ «Մաքսային ծառայության մասին» օրենքում փոփոխություններ մտցնելու մասին օրինագծի փաթեթի քննարկման ընթացքում հայտարարեց ՀՀ ֆինանսների նախարար Ատոմ Ջանջուղազյանը:
Նրա խոսքով՝ այդ ֆինանսները կարող են բյուջեի սովորական եկամուտ դառնալ: «Այդպիսով, այդ միջոցները կդադարեն ընդունված բյուջեի շրջանակից դուրս ռեսուրսներ լինելուց, եւ կկազմեն դրա մի մասը»,- հստակեցրեց նախարարը:
Ջանջուղազյանը հիշեցրեց, որ արտաբյուջետային հաշիվների առկայությունը հաճախ կոշտ քննադատության պատճառ է դառնում: Նախարարի խոսքով՝ դրանք չեն վերահսկվում ԱԺ-ի կողմից, այլ կարգավորվում են կառավարության կողմից:
«Ըստ էության, տվյալ օրենսդրական փաթեթով առաջարկվում է սահմանափակել պետական եւ տեղական իշխանության մարմինների՝ արտաբյուջետային հաշիվներ ունենալու հնարավորությունները: Միեւնույն ժամանակ, ենթադրվում է, որ այդ հաշիվների վրա հավաքված եւ առկա միջոցները կուղղվեն համապատասխան բյուջեներ՝ ապահովելով դրանց տեղաբաշխումն անհրաժեշտ ուղղություններով եւ անհրաժեշտության չափով»,- նշեց Ատոմ Ջանջուղազյանը:
Բացի այդ, նախարարի խոսքով, դա կապահովի պետական միջոցների բաշխման համակարգի ստեղծումը, որը մի կողմից կապահովի տնտեսության զարգացումը, մյուս կողմից՝ սոցիալական պաշտպանության ու պետության հասարակական պահանջների բալանսավորված ապահովումը:
Նշենք, որ օրինագիծը միաձայն դրական եզրակացություն է ստացել:
