Հյուսիսային Կորեայի իշխանությունները խախտում են մարդու իրավունքները, այդ թվում քաղբանտարկյալներին ծանր պայմաններ ունեցող ճամբարներում պահելու ճանապարհով։ Այս մասին ասվում է Հյուսիսային Կորեայում մարդու իրավունքների ոլորտում տիրող վիճակի մասին հարցերով ՄԱԿ հատուկ զեկուցող Թոմաս Օհեա Կինտանայի՝ չորեքշաբթի հրապարակված զեկույցում, տեղեկացնում է ՏԱՍՍ-ը։
«Մարդու իրավունքների հետ կապված իրավիճակը Հյուսիսային Կորեայում չափազանց լուրջ է,- ասվում է փաստաթղթում։- Լիակատար գաղտնիության պայմաններում շարունակում են գործել քաղբանտարկյալների ճամբարները, որոնցում ամենավատ պայմաններում պահվում են բազմաթիվ մարդիկ»։
«Չկա կարծիքի արտահայտման ազատություն, քաղաքացիների նկատմամբ գործում է վերահսկողության, հսկման եւ պատժի համակարգ, որը խախտում է նրանց իրավունքները»,- կարծում են կազմակերպությունում։
Միեւնույն ժամանակ, ՄԱԿ-ում ընդգծում են «այն քայլերի կարեւորությունը, որոնք նախաձեռնվել են Հյուսիսային Կորեայի իշխանությունների եւ Կորեական թերակղզու իրավիճակում ներգրավված այլ երկրների կողմից, խաղաղության եւ միջուկային զենքի տարածման դեմ որոնումներում»։
