Հայ-ռուսական միջպետական հարաբերությունները հիմնված են ամուր հիմքի վրա: Այս մասին այսօր մամուլի ասուլիսի ժամանակ հայտարարեց ՀՀ ԱԳՆ ղեկավար Զոհրաբ Մնացականյանը՝ մեկնաբանելով Հայաստանից Ռուսաստան եւ հակառակը գործիչների կողմից քաղաքական ապաստան որոնելու հարցը:
«Հայ-ռուսական միջպետական հարաբերությունները հիմնված են ամուր հիմքի վրա: Այդ հարցում տարաձայնություններ չկան: Կան որոշ դատական եւ իրավական գործընթացներ, սակայն միջպետական մակարդակով մենք ունակ ենք պահպանել դաշնակցային հարաբերություններից բխող առաջնահերթությունների օրակարգը: Այդ հարցերի միջեւ կապ չկա եւ չի կարող լինել»,- նշեց նախարարը:
Պատասխանելով ՌԴ նախագահ Վլադիմիր Պուտինի սպասվող այցի մանրամասների շուրջ տարբեր խոսակցությունների (օրինակ այն, որ Պուտինը կհանդիպի ՀՀ երկրորդ նախագահ Ռոբերտ Քոչարյանի հետ) մասին հարցերին՝ նախարարը նշեց, որ Հայաստանը պատրաստ է ընդունել ԵԱՏՄ գագաթնաժողովը, եւ խոսակցությունների վրա հիմնված հարցերին չպատասխանեց:
«Մենք պատրաստվում ենք գագաթնաժողովին եւ վստահ ենք, որ այն արդյունավետ կլինի, իսկ գործընկերների հետ հարաբերությունները կշահեն»,- ընդգծեց նախարարը՝ հաստատելով Երեւանում հոկտեմբերի 1-ին կայանալիք գագաթնաժողովին Իրանի եւ Սինգապուրի բարձրաստիճան պաշտոնյաների մասնակցությունը: