Իրանի կառավարության ներկայացուցիչ Ալի Ռաբիին, մեկնաբանելով ԱՄՆ նախագահի ազգային անվտանգության հարցերով խորհրդական Ջոն Բոլթոնի հրաժարականը, հայտարարել է, որ հեռացել է պատերազմի եւ տնտեսական ճնշման ամենախոշոր կողմնակիցը, փոխանցում է «ՌԻԱ Նովոստի»-ն:
«Ջոն Բոլթոնը շատ ամիսներ առաջ խոստացել էր, որ 3 ամսից Իրանը չի լինի: Մենք մինչեւ հիմա կանգուն ենք, իսկ նա հեռացավ: Պատերազմի եւ տնտեսական ճնշման կողմնակցի հեռացումով Սպիտակ տունը Իրանի իրողությունները հասկանալու ավելի քիչ խոչընդոտներ կունենա»,- նշել է Ռաբիին Twitter-ում:
Իրանի ԱԳՆ-ն իր հերթին հայտնել է, որ գերատեսչության ղեկավար Մոհամմեդ Ջավադ Զարիֆը, պատասխանելով ամերիկացի լրագրողի՝ Բոլթոնի հրաժարականը մեկնաբանելու խնդրանքին, հայտարարել է, որ նախարարությունը ԱՄՆ ներքին գործերի վերաբերյալ որեւէ հայտարարություն չի հրապարակի:
Ավելի վաղ ԱՄՆ նախագահ Դոնալդ Թրամփը հայտարարել էր, որ ազգային անվտանգության հարցերով իր խորհրդական Ջոն Բոլթոնին խնդրել է հրաժարական ներկայացնել նրա հետ տարաձայնությունների պատճառով: Նա հայտնել էր, որ նախատեսում է հաջորդ շաբաթ հայտարարել, թե այդ պաշտոնում Բոլթոնին ով կփոխարինի: Բոլթոնն իր հերթին հայտարարել էր, որ ԱՄՆ առաջնորդին ինքն է առաջարկել իր հրաժարականը:
