ԵԿՄ վարչության նախկին նախագահ, գեներալ Մանվել Գրիգորյանի պաշտպան Լևոն Բաղդասարյանն այսօրվա դատական նիստին միջնորդեց դատարանին՝ թույլատրել Գրիգորյանին պատկանող 7 միավոր անշարժ գույքերի տիրապետման իրավունքը տալ երրորդ անձին։
Փաստաբանը հիշյալ գույքերի սեփականաշնորհման վկայականները տրամադրեց դատարանին, որպեսզի դատարանը համապատասխան որոշում կայացնի և այդ գույքերի վարձակալությամբ ստացված գումարները փոխանցվեն դատարանի դեոզիտ հաշվին՝ պետությանը պատճառված հնարավոր վնասը հետագայում փոխհատուցելու նպատակով։
Դատարանն արձանագրեց, որ միջնորդության քննության համար պետք է պաշտպանական կողմը ներկայացնի 7 միավոր գույքերի վերաբերյալ հավելյալ փաստաթղթեր, մասնավորապես դրանց վարձակալության պայմանագրերը և այլն։ Այսպիսով միջնորդության քննությունը հետաձգեց, մինչև էական հանգամանքների պարզումը։
Համաձայն մեղադրական եզրակացության՝ Մանվել Գրիգորյանը ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի եւ քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել եւ իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաեւ կատարել է տարբեր տեսակի հափշտակություններ։
Նա մեղադրվում է 2016թ.-ի ապրիլյան քառօրյա պատերազմի եւ դրան հաջորդած օրերին Արցախի Հանրապետության սահմանների պաշտպանությունն իրականացնող զինվորականների եւ կամավորների կարիքները հոգալու նպատակով հատկացված գույքը յուրացնելու մեջ։
Հիշեցնենք, որ հունիսի 6–ին Մանվել Գրիգորյանը ծայրահեղ ծանր վիճակով «Դատապարտյալների հիվանդանոց» ՔԿՀ–ից տեղափոխվել էր «Սուրբ Գրիգոր Լուսավորիչ» ԲԿ, իսկ օրեր անց՝ «Նաիրի» ԲԿ։ Նրա նկատմամբ նշանակվել է համալիր դատաբժշկական փորձաքննություն։
