2020 թվականի փետրվարին ձեւավորվելու է մասնագիտական խումբ, որը զբաղվելու է սահմանադրական փոփոխությունների նախագծմամբ: Այս մասին, այսօր՝ սեպտեմբերի 27-ին լրագրողների հետ զրույցում նշեց արդարադատության նախարար Ռուստամ Բադասյանը՝ հավելելով, որ այն լինելու է բավականին ապաքաղաքական կառույց, այսինքն մասնագետներից է կազմված լինելու:
Հարցին, թե հնարավոր է, որ ՍԴ-ի շուրջ առկա ճգնաժամի լուծում ստանա հենց սահմանադրական փոփոխություններով, նախարարը պատասխանեց. «Եթե իրենք դրա անհրաժեշտությունը տեսնեն եւ համապատասխան լուծումներ առաջարկեն, այո, հնարավոր է»:
Դիտարկմանը, որ կա առաջարկ, որպեսզի ՍԴ-ն եւ Վճռաբեկ դատարանը միավորվեն մեկ մարմնում, Բադասյանն ասաց. «Մասնագիտական խումբը ինքը պետք է գնահատի: Մենք ունենք շատ վատ փորձ, երբ գործադիր իշխանությունն ինքն է թելադրում, թե ինչը պետք է փոխվի եւ ինչի համար: Մենք այդ ճանապարհով չենք գնալու: Մենք թողնելու ենք մասնագիտական հանձնաժողովն ինքը որոշի՝ արդյոք տեսնում է այն նախադրյալները, նման անհրաժեշտություն կա, թե ոչ: Ես անձնապես իմ կարծիքն ունեմ, բայց չեմ ուզում հիմա կանխորոշել որեւէ կերպ մասնագիտական խմբի աշխատանքը»:
Նա անդրադարձավ նաեւ ՍԴ դատավորներին՝ վաղաժամ թոշակի անցնելու գաղափարին՝ նշելով, որ դա հիմնված է կամավորության սկզբունքի վրա: «Բնականաբար, եթե լինի ցանկություն՝ կլինի: Չի լինի՝ չի լինի: Նախկինում միջազգային կառույցների կողմից քննադատվել է Լեհաստանի փորձը, որտեղ պարտադիր է եղել վաղ կենսաթոշակի գնալու մեխանիզմը: Մենք որդեգրել ենք կամավորության սկզբունքը»:
Հարցին, թե եթե ՍԴ դատավորները չօգտվեն դրանից եւ վաղ կենսաթոշակի չգնան, իշխանությունն ունի՞ այլ տարբերակներ ՍԴ-ում ստեղծված վիճակը հանգուցալուծելու համար, Բադասյանը պատասխանեց. «Չի բացառվում, որ մենք եւս ինչ-որ բան կարող ենք մտածել, բայց ես չեմ ասել, որ եթե սա չլինի, մենք այլ բան կանենք»:
Նշենք, որ կառավարությունն օրինագիծ է մշակել, որով հնարավորություն է տրվում ՍԴ դատավորներին հրաժարական տալ՝ միաժամանակ պահպանելով թե աշխատավարձը, թե հետագայում կենսաթոշակը:
