Միջտարածաշրջանային համագործակցությունը այն ոլորտն է, որն առաջնահերթ զարգացման կարիք ունի, քանի որ այն կարող է ավելի լիարժեք արտացոլել երկրների եւ ժողովուրդների միջեւ կապերի ողջ խորությունը, եւ թույլ է տալիս լիարժեք օգտագործել այն ներուժը, որը կա մեր հարաբերություններում։ Այս մասին Երեւանում Արխանգելսկի առեւտրի կենտրոնի բացման արարողության ժամանակ ասաց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը։
«Հաճելի է տեսնել ժպտացող մարդկանց, որոնք սովորել են զբաղվել պրակտիկ գործերով։ Ինձ կրկնակի հաճելի է, քանի որ, իմ կարծիքով, նշանակալի իրադարձություն է, երբ մենք բացում ենք, ըստ էության, տարածաշրջանի ֆիզիկական ներկայացուցչությունը Երեւանում, ինչը շատ կարեւոր է։ Երբ մենք տեսնում ենք «Ռուսական հյուսիսի տուն» ցուցանակը, հասկանում ենք, թե որքան սերտ եւ խորն են մեր երկրների եւ ժողովուրդների միջեւ կապերը»,- նշեց նա։ Արխանգելսկի նահանգապետ Իգոր Օռլովը հավելեց, որ այս նախագիծն ուղղված է այն հին ավանդույթների ամրապնդմանը, որոնք ստեղծվել են ժողովուրդների միջեւ եւ, անկասկած, բարեկամության լավ պահուստ են ստեղծում ապագայի համար։
Վայոց ձորի մարզպետ Տրդատ Սարգսյանը, իր հերթին, հայտարարեց, որ Արխանգելսկի տունը կլինի մի կենտրոն, որը միջմշակութային կապեր հաստատելու աշխատանքներ կիրականացնի։ Հիշեցնենք, որ Երեւանում հոկտեմբերի 7-ին բացվել է Արխանգելսկի առեւտրի տունը։ 2019թ․ մարտին Արխանգելսկում բացվել էր Հայաստանի տունը։
