Տնտեսագիտությունը դժբախտաբար, թե բարեբախտաբար ճշգրիտ գիտություն չէ եւ կարելի է հանդիպել Նոբելյան մրցանակի երկու դափնեկիրների, որոնք բացառում են մեկը մյուս գոյության իրավունքն ընդհանրապես: Այս մասին այսօր՝ հոկտեմբերի 9-ին, «Ի՞նչ անել-2 տնտեսական հեղափոխություն. ընկալումը և գործարկումը» գիտագործնական խորհրդաժողովում նշեց ՀՀ վարչապետ Նիկոլ Փաշինյանը:
«Այսպիսի գիտաժողովները կարեւոր եմ համարում հատկապես մտագրոհի տեսակետից: Սա ավելի մեծ էներգիա են տալիս երկրի զարգացման մեր մտածումներին:
Այսօր աշխարհում տնտեսագիտության մեջ առավել կարեւոր գործոններ են դառնում հոգեբանությունն ու տրամադրությունը: Հանրային տրամադրությունները, սպասումները, ակնկալիքները շատ ավելի մեծ տնտեսագիտական նշանակություն ունեն, քան ուղղակի չոր թվերը եւ այդ թվերի համադրությունը: Մենք Հայաստանի զարգացման հիմքում տեսնում ենք անհատական ջանքի կարեւորումը:
Ընթացիկ տնտեսական իրավիճակն ու ցուցանիշները, որոնք մենք ունենք գալիս են ապացուցելու այս թեզի ճշշմարտացիությունը, որ տրամադրությունները, մթնոլորտը շատ էական նշանակություն ունեն տնտեսական զարգացման համար: Ես կարծում եմ, որ Հայաստանում տնտեսական գործունեության շատ լավ տրամադրություն ստեղծվել: Մեր խնդիրը պետք է լինի այդ տրամադրությունն ամրապնդելը»,-ասաց նա:
Փաշինյանը նաեւ հավելեց, որ իհարկե կան բազմաթիվ կարգավորումների, պարզեցումների, տնտեսական գործունեության հնարավորություններն ավելի ընդլայնելու, դրանում ներգրավված սուբյեկտների համար հավասար դաշտ ստեղծելու հրամայականները, որոնք կառավարության համար առաջնահերթություն են:
