Հայաստանը «Արեւելյան գործընկերությունը» չի դիտարկում որպես եվրոպական հարեւանության քաղաքականություն, մենք մեր հարաբերությունները դիտարկում ենք արժեքային չափումների հարթության մեջ, ինչը խորացնում է իրավունքի գերակայության հիմքում ժողովրդավարության ամրապնդման ոլորտում համագործակցությունը: Այս մասին այսօր՝ հոկտեմբերի 9-ին, «Արեւելյան գործընկերության» 10-ամյակին նվիրված «Ապրել խելացի, հզորացնել երիտասարդներին» համաժողովի ընթացքում իր ելույթում ասաց արտաքին գործերի փոխնախարար Ավետ Ադոնցը:
Նա համոզմունք հայտնեց, որ ժողովուրդների միջեւ շփումը կարեւոր նշանակություն ունի, հատկապես՝ երիտասարդության շրջանում, եւ Հայաստանը շեշտը դնում է այդ ուղղությամբ տարբեր ծրագրերի դերի վրա:
«Բացի այդ, ԵՄ-ը Արեւելյան գործընկերության» շրջանակում իրականացնում է տնտեսության ոլորտում զարգացման ծրագրերը, ինչը շատ կարեւոր է»,- նշեց փոխնախարարը:
Հայաստանի կրթության, գիտության, մշակույթի եւ սպորտի փոխնախարար Արեւիկ Անապիոսյանն, իր հերթին, ընդգծեց, որ զարգացման ծրագրերն ամբողջ աշխարհում ուղղված են երիտասարդությանը եւ մարդկային կապիտալի զարգացմանը։ «Այդ գործընթացի արդյունավետությունը կարող է ապահովվել նաեւ ապակենտրոնացման եւ բացության միջոցով։ Կրթությունը պետք է լինի տարբեր մոտեցումների համադրման միջոց։ Կարեւոր է գտնել հավասարակշռություն կրթության ոլորտում զարգացման եւ ճկունության միջեւ, որպեսզի ոչ թե վազենք զարգացման հետեւից, այլ ինքներս զարգանանք»,- նշեց նա։
Իսկ բարձրտեխնոլոգիական արդյունաբերության փոխնախարար Գեղամ Վարդանյանը նշեց, որ բարձր տեխնոլոգիաների զարգացման համար կարեւոր է մարդկային կապիտալի զարգացումը կրթության, գիտության եւ մշակույթի միջեւ։
