Սիրիայում Թուրքիայի ռազմական գործողություններից առաջ Թուրքիայի նախագահ Ռեջեփ Էրդողանին ուղղված ԱՄՆ նախագահ Դոնալդ Թրամփի նամակի լեզուն հաճախ չես հանդիպի պետական առաջնորդների նամակագրությունում: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, հաղորդում է ՌԻԱ Նովոստին:
«Նման լեզուն հաճախ չես հանդիպի պետական առաջնորդների նամակագրությունում: Դա շատ անսովոր նամակ է»,- լրագրողներին ասել է Պեսկովը:
Ավելի վաղ Fox News հեռուստաալիքի թղթակից Թրիշ Ռիգանը հրապարակել է ԱՄՆ նախագահ Դոնալդ Թրամփի անձնական նամակի կրկնօրինակը, որում Թրամփն Էրդողանին «լավ գործարք» է առաջարկում:
Նամակում Թրամփն Էրդողանին առաջարկել է բանակցություններ սկսել քուրդ գեներալ Մազլում Աբդիի հետ, չփորձել «լավ տղա» երեւալ եւ «հիմար չլինել»:
